Vawiin khan Horticulture Department chuan Champhaia thlai chingtute hnenah zikhlum tiak sing khat a sem a. Champhai DC Pu Zoengsanga chuan thlai tiak semna hun, Champhai Horticulture Training Hall-a neih chu hmanpuiin, Champhai leilung leh sik leh sa chu thlai in an ngeih thu leh, rim taka thawk tan chuan an tha sen a thlawn dawnlo a ni, a ti.

Pu Zoengsanga chuan thlai tiak semchhuah atang chuan a let leh zat tur, tharchhuah zat tur chu hriat chakawm a tih thu sawiin, nakin a thlai a thar hunah chuan chhuan tlak tak report an pek ngei a beisei thu a sawi a. Thlai chi tha ber ber neih dan atanga thlai thar tawhte hralhchhuah dan tur thlenga ngaihtuahsaktu Horticulture Department-a thawkten tha leh ngaihtuahna an lo sen tawh chu an tih thlawn loh a beisei thu kalkhawmte chu a hrilhbawk.

Vawiin zikhlum tiak sem hi Farmers’ Interest Group, Zotlang, Champhai ten an nursery-a an kui tiah a ni a. Kumin chhung hian zikhlum hi tiak nuai 39.56 sem tum a ni a. Hemi bakah hian purun, tomato, broccoli leh capsicum tiak te la sem tur a ruahman a ni bawk a. Champhai leh a chhehvel a nursery 11-a kui tiah an ni hlawm a ni.

Kum hmasa lamah te Horticulture hian thlai chi an sem thin a. Amaherawhchu tih riral mai mai a tlem zawk nan leh, uluk taka nursery thlan bikte a kui sa a nih avangin kumin atangin thlai tiak hi sem a ni ta zawka ni.

Vawiin thlai semna programme hi Pu V. Lalzuithanga, DHO, Khawzawl-in a kaihruai a. Pu C. Lalremsiama, SDHO, Champhai-in technical report a pe a ni.