Vawiin chawhma khan Horticulture Department huaihawt Trainer’s Training Under MIDH( Mission for Integrated Development of Horticulture) Closing function, Horticulture Conference Hall-ah hman a ni a. Horticulture Minister, Pu P.C. Lalthanliana chu khuallian niin, Parliamentary Secretary to Horticulture Department, Pu. K Lalrinthanga chu khualzahawm a ni.
Pu P.C. Lalthanliana chuan trainer’s training buatsaih a ni hi lawmawm a tih thu leh department pawhin an tangkaipui ngei a beisei thu a sawi a. Kalkhawmte hnenah inpawh leh lungrual taka thawhho hi chakna bula a ni, a ti a. Hotute pawimawhna hrang hrang tarlangin inthliar hranna tel lova hna thawh tulzia leh hna ti khawtlai lova kalpui thin turin a fuih a. Minister chuan kan ram sum leh pai dinhmun leh eizawnna te hi horticulture ah a innghah thuk thu sawiin, department hnathawh hian kan ram kalhmang a tha zawngin a her danglam thei a ni, a ti.
Pu K. Lalrinthanga chuan Horticulture department chu department naupang tak ni mahse an hmalakna hrang hrang te chu fakawm a tih thu a sawi a. An hnathawhna kal zelah training te neia uluk taka zir lawk thin turin a chah a. Ham thatna pawh dawng tu tur dik tak te’n an dawn theih nan tan lak a ngai a ni, a ti a. Nu leh pa te chauh ni lovin thalai te thlengin kan tanrual chuan tun ai tam zawk kan tharchhuak thei a ni, Parliamentary Secretary chuan a ti bawk.
He closing function hi Horticulture Department Jt.Secy, Pi Lalhrangliani chuan kaihruaiin, department hmalak dan tur hrang hrang Dy. Director, Pu Vanlalruata Chenkual chuan a sawi a. Taiwan leh Bangladesh tour report kimchang ngaihthlakna neih a ni a. Khuallian chuan Aieng ( turmeric powder) organic-Tisopi, Siaha product tlangzarhin, Horticulture Director, Dr. Elizabeth Saipari chuan lawmthu sawina in hun a khar a. Chawhnu lamah Horticulture Centre, Chite tlawhna hun neih bawk a ni.
He training hi April Ni 11 khan neih a ni a. MIDH hi sawrkar laipui scheme niin hemi hnuaia hmalakna te zir hona neih a ni a.
He hunah hian anthurium leh dragon fruit thar chhuah kawngah Mizoram hriatlar anih thu leh thlai thar te state pawna thawn chhuak tura hmalakna sawiho a ni a. Department lam hotu te, Technical officers , field staff te leh hnathawktu Mizoram hmun hrang hrang atangin an kal kim hle a ni.
