Vawiin khan Saikuti Hall, Lungleiah Horticulture Lunglei Division leh Mizoram Florist Association, Lunglei te tangkawp buatsaihin ni thum awh tur (12^th – 14^th February, 2020) ‘Horticulture Exhibition 2020’ hawnna neih a ni. He hunah hian Prof. F. Lalnunmawia, MLA, Vice Chairman, Horticulture Development Board chu khuallian niin Pu Lawmawma Tochhawng, HPC Vice Chairman chu khualzahawm a ni. He hunah hian DIG Sr Pu Rajneesh Gupta, SP Pu C. Lalthanmawia leh sawrkar official dangte, tlawmngai pawl aiawhte, Lunglei MJA-te leh kuthnathawktute an tel a ni.

Hawnna inkhawm Pu L. Lalhmingmawia, DHO Lunglei kaihhruaiah Vice Chairman, Horticulture Development Board Prof. F. Lalnunmawia chuan kuthnathawktute hmakhua ngaia an tharchhuahte pholanna leh zawrhna hun tha tak buatsaihtu Horticulture Lunglei Division leh Mizoram Florist Association, Lunglei te hmalakna chu ropui a tih thu sawiin an chungah lawmthu a sawi a. Mizoramin ei leh bara  kan intodelhna theihna tura hmalakna kal mekah Horticulture Department chu a pawimawh takzet a ni tiin thei, thlai leh pangpar chin uar mai bakah kan tharchhuahte sawngbawl (food processing) lamah te theihtawp kan chhuah chhunzawm zel a tul a ni, a ti a. Ram changkang zawkte tih dan leh mipui hriselna atana pawimawh tak ‘Organic Farming’ Mizoramah uar taka kalpui tum a nih thu pawh sawiin Horticulture Development Board Vice Chairman chuan organic farming kaltlang hian kuthnathawktuten thei leh thlai hrisel zawk leh tam zawk an thar chhuak thei dawn a ni, a ti bawk. ‘Horticulture Exhibition 2020’ chu kuthnathawktute leh mipuiten tangkai taka an hman theih nan duhsakna a hlan a ni.

He huna khualzahawm Lunglei HPC Vice Chairman Pu Lawmawma Tochhawng pawhin thu sawiin ‘Horticulture Exhibition 2020’ chuan ei leh bar tharchhuah kawngah leh hemi kaltlanga sumdawnna lamah te hmasawnna tam tak a thlen ngei a beisei thu a sawi a. Kan ram economy ti hmasawn turin phai leh hmun dang atanga thil lakluh chauh a tawk lova, kan tharchhuah leh kan siam chhuahte ram pawnah kan thawnchhuaha kan sumdawn ve a tul a ni tiin kuthnathawktute leh sawrkar official-te pawh chutiang rilru pu tur leh hma la turin a sawm a. HPC Lunglei hmalakna te pawh sawilangin Lunglei District iskut leh artuia intodelh turin hmalak mek a nih thu a tarlang a ni. 

Pu H. Manthianga, Jt Director, Horticulture Department, Dr Saidingpuii Sailo, Secretary, Mizoram Florists Association Lunglei leh Dr Lalkailiani, President, Mizoram Florists Association, Aizawl te pawhin thu an sawi a ni.

‘Horticulture Exhibition 2020’ ah hian Lunglei District-a kuthnathawktute tharchhuah thlai leh pangpar chi hrang hrang Category 40 hnuaiah item 375 pho chhuah an ni a. Category tinah hian lawmman pakhatna atanga pathumna buatsaih a ni. Pakhatna hian cheng sang khat (Rs. 1000/-), pahnihna in cheng za sarih (Rs. 700/-) leh pathumna in cheng za nga (Rs.500/-) an dawng a ni. Tin, Lunglei District-a entrepreneur 10-ten stall an hawng a, pickle, leitha, thei tui, kuthnathawktute hmanrua leh thlai thar leh pangpar chi hrang hrang lei tur a awm a ni. Horticulture Exhibition-hi 14^th February (Friday) tlai thleng neih a ni ang. 

Horticulture Lunglei Division leh Mizoram Florist Association, Lunglei te chuan mi zawng zawng he Exhibition hi chhim turin an sawm a ni.