Deputy Chief Minister Pu Tawnluia chuan Administrative Training Institute(ATI) ah Multi Level Car Parking leh Video Conference Hall a hawng a. Hemi rualin ATI Auditorium ah ATI in Ministry of Commerce hnuaia International Standard Organisation (ISO) Certification a dawn lawmnaah a tel nghal a ni.

Deputy Minister Pu Tawnluia chuan Sawrkar hnathawkte mamawh ang zela zirtirna course hrang hrang leh training keng kawhtu ATI a hnathawk ten hun tha tak an pe chu lawmawm a ti a. Deputy Minister chuan Kum 2018 atanga UD&PA Department hmalaknaa Bus Lian leh Motor 29 vel park theihna Multi Level Car Parking chu ATI hnathawk bakah ATI a training kal ten tangkai taka an hman a beisei thu a sawi a. Khawpui chhunga motor parking tha neih hi Smart City Scheme thil tum pakhat leh tun Sawrkar pawhina a ngaih pawimawh ber te zinga mi a ni, a ti a. Deputy Minister chuan Sawrkar hnathawk leh State Service hrang hrang ten thurawn engtik lai pawha an pek theih thu leh finchhuah zel turin a sawm bawk a ni.

Multi Level Parking ah hian Motor 29 vel a leng a, cheng nuai 140 seng a UD&PA sak a ni. Kum 2018 October atanga sak tan a ni a, Kum 2020 January ah sak zo a ni.

Video Conference Hall hi cheng nuai 3 senga sak a ni a, hmun hla atanga training lokal theilo te tana hman tangkai tur leh man chawia hawh theiha siam a ni.

He hun hi ATI Director Pu R. Kesavan in a kaihruai a, ATI Joint Director (Admin) Pi Angela Zothanpuii chuan Report tawi a pe a, ATI Joint Director (Trg.) Pi Malsawmdawngliani’n lawmthu sawiin he hun hi a khar a ni.

ATI, Mizoram hi Kum 1983 a din a ni a, hun rei tak chhung Building nei lo in an awm hnuah Kum 2015 ah UD&PA hmalakna in NBCC atanga sum hmuin tuna ATI Building, MINECO hi sak tan a ni. Tun dinhmunah hian Auditorium 13  a awm a, thawktu 43 an awm a ni.

ATI ah hian sawrkar hnathawkte hnenah rules leh regulations zirtirna leh training bakah NGO hnenah te thupui thlanbik neiin training a buatsaih thin a . Mizoram hmun hrang hrangah Core Faculty ten kal chilhin Department mamawh danin training a buatsaih thin bawk a ni. Kum 2019-2020 chhung hian  training buatsaih tur 75  hmachhawp an nei mek a ni.