Chief Minister Pu Lal Thanhawla chuan Horticulture hi khawvelah eizawnna tling, ram ti hmingthangtu a ni, a ti. He thu hi vawiina Mizoram Florists Association buatsaih pangpar khawibu - Bu 2 na I & PR Auditorium-a tlangzarhna a a sawi a ni.

Chief Minister chuan pangpar lama tuimi te leh eizawnna nana hman tumtute tana kaihruai theitu tur lehkhabu pawimawh tak tlangzarh theiha a awm chu lawmawm a tih thu a sawi a. Mizoram sik leh sa tha tak hnuaiah pangpar chi hrang hrang ramhnuaia awm te hi enchhin tha a tih thu sawiin, zirchian tham (culture tham) a awm a ni a ti.

Chief Minister chuan Mizote hi pangpar khawiah (arrangement) state dang tam tak ten min pha lo a ni a ti a, a buaipuitu te erawh mipa an ni deuh zel a ni, a ti. Pangpara Lengpui Airport chei chungchangah Mizoram Florists Association chu fakawm a tih thu sawilangin, Air Hostess thenkhat te chuan India rama airport mawi ber an ti hial a ni, a ti. Hemi lamah hian Mizo ten pangpar ngaihhlut leh dimdawi nachang kan hre chho ve zel ta hi thil lawmawm tak a ni, a ti a. Netherland chu tulip pangpar avangin khawvel hriat hlawh a tling a, Thailand pawh pangpar avanga ram lar anih thu a sawi bawk a ni. Pu Hawla chuan Mizorama nauban hlu tak tak kan neihte hi pawnlam mi ten min suasam sak tak tak hma hian a humhalhna kawngah mipui harhthar a, sorkar hmalakna tawiawm turin a chah a ni.

Chief Minister chuan thil kan siamchhuah leh thawhchhuah te pholanna tur hmun Exhibition Ground ngaihtuah ran a tul tih sorkar-in a hria tih sawilangin hemi kawnga sorkar finchhuah zel turin mipuite a chah a. Mizoram Florists Association,November 1997 din hi chak zawk leh tha zawka a kalchhoh zelna turah duhsakna a hlan a ni.

Lehkhabu tlangzarh tak hi a chhutkhatna (Bu 1 na) chu kum 2006 khan tlangzarh a lo ni tawh a, tuntuma mi 2nd Edition ( Bu 2 na) hi phek 140, lehkha puan tha chi a siam, thlalak te pawh colour vek a ni a. Copy 2000 siam a niin, thuziaktute hi mi 4 an ni a, a kawm hi lehkha chhah chi jacket neia siam a ni. Tlangzarh ni hian Rs. 600/- a hralh a ni a, nidangah chuan Rs. 700/- a hralh a ni ang.

Inkhawm hi Pi Lalropari, President, Mizoram Florists Association in a kaihruai a. Lehkhabu chhunga thuziaktute hnenah Pi Lal Rilianin lehkhabu hi a hlan theuh bawk a ni.

Attachment

  • Loading attachment...