Nimin 26th October zing dar 10:30 ah Home Minister Pu R. Lalzirliana chuan October 22, 2011 zing dar 1:30 a Silchar bula misualin Aizawl atanga Guwahati pana tlan, Joshua Sumo an suamnaa misualte a beihna letna avanga hliam na tak tuar Assam Regiment sipai J. Laltanpuia, Tachhip khua chu Mashimpur Army Hospital-ah a tlawh. Huaisen taka misualte a beih let ngam avanga lawmthu a hrilh bakah damlo kanna pawisa ama discretionary fund atangin Rs. 20,000; Pu K.S. Thanga, Parliamentary Secretary kanna Rs. 5000; Pu Lalsawta, Education Minister kanna Rs. 2000; Pu Lalrinmawia Ralte, Parliamentary Secretary kanna Rs. 3000 leh Pu L. Hrangnawna, IGP kanna Rs. 500 aviin Rs. 30,500/- J. Laltanpuia hnenah hian a hlan nghal.
Mashimpur Army Hospital a pan hmain Home Minister hian Pu Binod Kumar, IPS, DIG Southern Range (Assam) leh Cachar District Police thuneitute Mizoram House-ah kovin Assam State chhunga Mizo khualzinten misual kut an tuar fo chu Mizoram sorkar leh mipuiten hriatthiam har an tih thu leh hetiang thil a thlen tawh lohna tura hmala tura a duh thu a hrilh. DIG pawhin hetiang thil a thlen tawh lohna tura theih tawp chhuah a tum thu te, he Sumo suamtute zinga mi 2 an man tawh thu te, Mizoram Maxicab-te tana escort pek an inhuam thute sawiin, a theih chuan zan lama Maxicab tlante pawh convoy-in kal thei se an duh thu a sawi bawk. Home Minister chuan thawhhona tha a awm zel theih nan Kolasib S.P. leh Cachar District Police hotute thla 2 danah tal meeting neih thin nise tih a rawt nghal bawk.
Sipai hliam leh a chhungte pawh in Mizoram sorkar Home Minister meuhin an vanduaina a hriatpui mai bakah an fapa hnena a kanna atan cheng tam tak an pek avangin an lawmthu Mizoram sorkar; Liaison Officer, Silchar; YMA Silchar Branch leh Mizoram mipuite chungah an sawi bawk a, an fapa pawh a dam thuai an beisei thu an sawi.
Home Minister hi Pu Lalrinmawia Ralte, Parliamentary Secretary (Home), Pu L. Hrangnawna, IGP; Pu Madhu Verma, IPS, SP Kolasib; Pu James Lalrinchhana, L.O. Silchar; Pu K. Lalrohlua, SDO (C) Vairengte leh Pu Lalthangmawia Vandir, Dy. Director, I & PR ten an tawiawm a ni.
