Tunkar ni 16.1.2018 (Thawhlehni) khan Horticulture Minister Pu P.C. Lalthanliana’n hovin Horticulture Department Bi-Monthly Meeting neih a ni a; Horticulture Secretary Pu P. Lalchhuanga’n meeting hi a kaihruai a ni.

Horticulture Department Officers leh hnathawk dangte fuihna thu sawiin Minister chuan Horticulture-a hnathawk tuten taima taka hna an thawh avang leh Achievement a that avangin Central Sawrkarin kum 2017-2018 chhunga additional fund atan MIDH hnuaiah sum cheng vaibelchhe 10  pek belh a tum chu thil lawmawm tak a ni, a ti a. Hetianga thawh that avanga sum tam tham pek belh hi a la awm ngai lo a ni a ti bawk. Nikumah Off-Season Zikhlum leh Tomato tharchhuahah hlawhtlinna duhawm tak neih naah lawmthu a sawi rualin, kum 2018 hian nasa zawka hnate chhunzawm zel turin Department Officer-te a fuih a ni. Tun dinhmunah fur zikhlum 10,070 qtls. seng tawh niin, cheng 3,02,08,500/- loneituten an lei chhuak tawh a, Tomato pawh 2,943 qtls. thar tawh niin Rs. 1,17,74,680/- lai Tomato chingtuten an lei chhuak tawh a; NLUP hnuaiah a fur a thala motor kal theihna tur Link Road siam tur Department-in hmalak a tum thu a sawi bawk. NLUP ah a hma aia tha zawka hma la leh zual turin Department Officers te a fuih bawk a ni. Mizoramah thu mai nilova a taka electric power siamchhuahna a nih theih nan Chief Minister Pu Lal Thanhawla ngaih pawimawhna leh thawhrimna avangin hmanni lawkah 60MW siamchhuak thei Tuirial Hydel Project  India ram Prime Minister meuhin a hawng te kha Mizoram Power & Electricity chanchina chhinchhiah tlak a ni reng dawn a ni, a ti bawk. Chuti rual chuan kwlphetha (energy) renchem inzir a ngai a, energy a ni emaw ei leh bar a ni emaw harsa taka siamchhuah leh thawhchhuah ngai an nih avangin thiam tak leh awmze nei taka hman zir hi khua leh tui thate tih tur duty dik tak a ni a; Horticulture Department officer-ten meeting an neih ruala ECBC (Energy Conservation Building Code) chungchang an zir tur pawh tangkai taka hmang turin kalkhawmte a chah a ni.

Meeting Chairman Horticulture Secretary Pu P. Lalchhuanga pawhin kan huan leh leilet te tanpuina dawhthlak nana hmang mai lovin leh tuna farmers te kalphung  pangngai duhtawk lovin, sumdawnna hlawkpui tham rahbi chuangkai thei tawh tura tanlak a pawimawh thu a sawi a. Horticulture hi Mizoram intodelh theihna dinhmuna siam turin Horticulture Officers te a fuih.