Vawiin khan Minister Pu PC Lalthanliana hovin Horticulture officer te’n an Directorate Conference Hall ah meeting an nei. Meeting-ah hian Horticulture Parliamentary Secretary Pu K.Lalrinthanga leh Secretary Pu B.Lalhmingthanga te pawh an tel.

Minister chuan kum kalta 2014 a Horticulture Department hmalakna thlirletna leh 2015 a hnathawh dan tur rela an kalkhawm thei chu lawmawm a ti a. Sorkar laipui atanga sum hmuhte State budget-a rinluh a nih tak avangin sum hman kawngah uluk leh zuala kal a tul a, sum harsatna avangin duh hun hunah sum lakchhuah mai theih a nih lo a, fimkhur leh renchem takin, a daihzai zawnga sum hmang turin officer kal khawmte a chah a ni. Pu PC Lalthanliana chuan kumin kum kal mekah hmalakna hrang hrang an kalpui mek leh bul an tan thar tur te uluk taka bawhzui turin a chah a, Division tin te hnathawh a taka hmuh a duh thu a hrilh a. Sorkar atanga tanpuina dawng kuthnathawktu tam tak zingah hlawhtlinpui ngei tura tan la an tlem thin chu pawi tiin beneficiary te hnathawh dan enzui kawngah officer-te taima lehzui turin Horticulture Minister chuan a fuih a ni.

Thusawitu dang Parliamentary Secretary Pu K.Lalrinthanga pawhin farmer –te hmasawnna turin Horticulture mithiamte finchhuah leh kaihhruai an mamawh hle a ni, a ti a. Ram leilung awmdan, sik leh sa leh ruahtui tlak dan milin thlai leh thei thatna hmunte a awm thin a, farmer-te’n an dinchhuahpui ngei theihna tur thlai leh thei an chin thiam theih nan kawng kawhhmuh turin Horticulture Officer te a chah a ni.

Vawiin meeting hi Horticulture Director Pu R.Zotawna’n a kaihruai a. Horticulture Minister hova South East Asia tlawha Exposure tour an neih report ngaihthlak a nih bakah agenda chi thum – requirements of planting materials, mater relating audit of district officers leh annual action plan te an sawiho a ni.