Horticulture Minister Pu PC Lalthanliana chuan Pu C. Lalawmpuia Champhai Vengsang Grape huana Horticulture Department in Grape tha chi enchhinna hmun tukin zing kar khan a tlawh a, Weather Station leh Grape thar hlawkna leh a rahrualna damdawi hmanga enkawl Grape huan a tlawh nghal bawk.

Mizoram Horticulture Department leh National Research Centre for Grapes (NRCG) tangkawpin Grape chitha pasarih chu Pu C. Lalawmpuia Champhai Vengsang Grape huanah hian enchhin mek a ni a. He Weather Station hmang hian karkhat chhunga khaw-awmdan tur a hriatlawk theih bakah huanthlai chi hrang hrang eichhe thei leh tichhe thei tur rannung lo puanchhuah dan a tarlang tel thei nghal a, hei hi huan/lo ram a thlai chingtute tan thil tangkai tak anih tur thu Minister chuan a sawi.

Heng Grape thachi - REISLING, CHANDONNAY, CABERNET BLANC, SAUVIGNOR FRENC, TEMPRANILLO, BENGALORE BLUE leh BENGALORE PURPLE te hi phai khawlum ngam chi deuh ni hlawmin, hmun vawt zawk Champhaiah pawh an thang tha tlangpui, tih Horticulture hotute chuan Minister hi an hrilh a. A bikin Bungalore Blue (Khawchhak tlangdunga chin mek) leh Bungalore Purple te chu a hlawhtling hle dawn niin Horticulture hotute chuan an sawi bakah heng Grape thachite hi Table Purpose leh Wine siam chhuahna atan a hman thin an nih thu an tarlang bawk.

Hlawk zawka Grape a thar theihna tur leh rualkhai zawk a Grape a rah theihna turin Horticulture Department chuan Grape chingtute hnenah damdawi- Hydrogen Cyanamide (Dormacy Breaking Chemical) an pek chu a hlawhtling hle dawn a hriat a nih thu leh he damdawi hian rualkhai zawka Grape a rahtir bakah a thar pawh hlawk ngei dawna an hriat thu Horticulture Department hotute chuan sawiin, he Damdawi hmanga Grape enkawltu Pu C. Lalawmpuia chuan nikum lam aiin kuminah a Grape rah a that bakah a rah pawh a rual zawk thu leh Grape tam zawk a thar theih ngei a beisei thu Minister hi a hrilh a ni.

Hydrogen Cyanamide hman hian rualkhai tak leh rah tam zawk a chhuah theih avangin Champhai leh a chheh velah he damdawi hmangtute Grape rah chu a that bakah a rah pawh a rual tlang hle hlawm a. Kum dang zawng aiin kumin hian grape rah an thar that zawk beisei a ni. Nikum (2015) khan Pu C. Lalawmpuia hian Grape Quintal 88.71 a thar chhuah laiin, Grape enkawlna atana he damawi a hman avangin kuminah Grape quintal 100 chuang a thar ngei an beisei thu Horticulture Department chuan sawi bawk. Minister hi Parliamentary Secretary Pu TT Zothansanga leh Champhai Addl. DC Pu C. Lalzarliana te bakah Horticulture Department hotuten an tawiawm a ni.

He Weather Station enduh a lut duh tan www.sk croptech.in niin, password chu mizoramsanga tih a ni.