Mizoram Larsap Lt. Gen. Nirbhay Sharma, PVSM, UYSM, AVSM, VSM (Retd.) chuan vawiin chawhma dar 11:30 khan Mizoram Ex-Servicemen League Office, Treasury Square ami chu a tlawh a, Mizoram Ex-Servicemen League hian Larsap hi India ram leh a mipui te tana hna a lo thawh tawh te ngaihhlutsak a, D.Litt. Degree pek a nih lawmpuina leh chawimawina hun an buatsaih sak a ni.

Larsap chuan Ex-Servicemen te hma ah thu sawiin an duhsakna thinlung chuan a rilru a khawih thu leh thinlung chhungril taka a lawmthu a sawi a, kum 1963 atanga India ram tana a feh chhuah atangin India ram State zawng zawng deuh thaw ah Ex-Servicemen te a kawm tawh a, Mizoram Ex-Servicemen te tluka nelawm leh amah titlangnel thiam a la tawn loh thu a sawi bawk. Larsap chuan Mizoramin State naupang te ni chunga Larsap atan Ex-Servicemen pathum lai an nei tawh chu thil chhinchhiahtlak tak a ni a ti a, ram leh khawtlang nun siamthat kawngah Ex-Servicemen ten mawhphurhna leh tih tur tam tak an nei tih sawiin Larsap chuan Ex-Servicemen te chu mahni inthunun thei leh invawng uluk, India ram tana mi rinawm leh ram leh hnam inpumkhatna ngaipawimawhtu an nih avangin midangte tana entawn tur tam tak an nunah a awm a, midangte zirtir tur leh kaihruai tu pawimawh tak an ni thei tih hria a khawtlang tana an theihna te hmang thin turin a chah a ni.

Larsap chuan India ram chu sakhaw hrang hrang, hnam hrang hrang leh tawng hrang hrang hmangtu awmkhawmna kan ni a, Sipai te hi an thawh hun chhunga India ram hmun hrang hrang a awm a hnam hrang hrang bula thawk an nih avangin midangte leh hnam dangte dinhmun hriatthiamna zau tak an neih avangin India ram inpumkhatna atana entirna pawimawh ber an ni a ti a, anmahni pawh inkawmngeih a thawhhona tha ytak nei chhunzawm zel turin duhsakna a hlan a ni. Larsap chuan kohhran leh tlawmngai pawl te hmalakna fakin an thahnemngaihna leh sawrkar an thawhpui thiamna zarah Mizoram chu ram ralmuang leh chenna nuam a chang ani a ti a, hnam ziarang leh nunphung te hloh lo turin Mizoram mipuite chah in an zahawmna humhimna tura rahbi pawimawh tak ani tih hre thar thin turin a chah bawk.

Larsap chuan Mizoram chu Cancer, Zu, Drugs leh HIV ten a run mek ani tih sawiin he harsatna do tur hian Sawrkar, kohhran leh tlawmngai pawl te bakah Ex-Servicemen ten mawhphurhna lian tak an nei tel tih inhria se a duh thu a sawi a, Ex-Servicemen te chu an insumtheihna, taksa hriselna vawn uluk kawnga an in enkawl dan te, an taimakna, ei leh in thleng a nunphung hrisel taka nung thin an nih avangin an taksa pawh kum upat hnu thlengin hrisel tha tak leh chak tha takin a awm thin a, thangtharte leh mipui ten an entawn theih nan zirtirna leh kaihhruaina pek kawngah thahnemngai tura a duh thu a sawi bawk. India ram chhunga cheng vek kan nih avanga inangkhat vek kan nih thu sawiin Larsap chuan Mizo thalaite chu an rilru sukthlek leh an khaw hawi ti zau a India ram hmun chhungril zawk luhchhuak ngam tura a duh thu sawiin abik takin inrintawkna min pe tur chuan Hindi tawng thiam a pawimawh a ni a ti a, 10 Assam Rifles leh Sub-Headquarters YMA, Serchhip tangkawpin Hindi tawng zirna an buatsaih chu thil lawmawm leh chhinchhiahtlak, hmasawnna kawnga ke min pen tir tu ani tiin a lawmthu a sawi bawk.

Larsap hi Shri JJT University, Mumbai in India ram leh mipuite tana a hnathawh that vanga May ni 4, 2016 a Doctor of Letters (D.Litt.) Degree (Honoris causa) an lo hlan tawh lawmpuina leh Mizoram tana thahnemngai taka hna a thawh vanga lawmthu sawi nan vawiin hun hi buatsaih a ni a, Larsap chawimawina inkhawm kaihruaitu Mizoram Ex-Servicemen League (MESL) President, Prof. Lalkima'n chuan Larsap chu Mizoram Larsap lo ni tawh te zinga an Office tlawh hmasa ber anih avangin an thinlung takin an lawm tih a sawi a, Lt. Col. ZS Zuala, Parliamentary Secretary, MESL member Larsap hnenah a hlan a, Vote of Thanks sawitu Maj. K. Thangkima chuan Indo-Pakistan War hunlai, December ni 11, 1971 a "Operation Cactus-Lily" East Pakistan a hlawhtling taka an neih tumin Airborne Assault Group ah Larsap te nen hian an awmho thu leh an Adjutant anih thu sawiin, hotu tha leh rintlak Mizoramin kan nei chu vanneihthlak a tih thu a sawi bawk a ni. Larsap hian Mizoram Ex-Servicemen League tanpuinan tangkafai Rs. 10,000/- a hlan a ni.

Mizoram Ex-Servicemen League hi kum 1958 khan Mizoram Ex-Services Association tih hming chawi a din niin Sub.Maj. Lalsiama chu President hmasa ber a ni a, kum 1979 khan an hming thlakin Mizoram Ex-Servicemen League tih an lo ni ta a, an President hmasa ber chu Mizoram Chief Minister hlui Brig. T.Sailo (L) a ni a, Ex-Servicemen League member hi tun dinhmunah 5763 (Aizawl-3585, Lunglei-899, Chgamphai-786, Kolasib-493) niin chhungkaw 4296 an awm a, hmeithai (veer naris) 10 awm bawkin an member zinga pahnih Lt. Col. ZS Zuala leh Capt. Hmingdailova Khiangte te chu MLA tanglai niin Parliamentary Secretary an ni ve ve a ni.