2740/2026-2027

Dated Aizawl, the 19 October 2026: Vawiin khan Horticulture Department changtu Minister Pu C. Lalsawivunga chuan a office chamber, MINECO-ah, Mizo hmeichhia, Strawberry hlawhtling taka chingtu, October ni 16, 2026a World Food Forum 2026, FAO Headquarter, Rome, Italy-a neih zawh taka khawvel pum huap chawimawina 'FAO 100 Women Heroes in Agrifood Systems and Rural Development' lawmman dawngtu Pi ZT Lalrithangi w/o F. Zabiakliana, Sangau khua, Lawngtlai District a mi chu lawmpuina thilpek a hlan.

Lawmpuina puala hun hmanah hian Horticulture Department changtu Minister Pu C. Lalsawivunga chuan thusawiin, khawvel pum huap pawha Mizote theuneu loh zia tihlan a ni leh ta chu lawmawm a tih thu a sawi a. Mizo nu, mahni tuina kawnga theihtawp chhuaha khawvel pum huap chawimawina hial dawng thei a nei chu Mizoram pawhin a chhuang hle tih sawiin, Mizo hmeichhiate tan entawn tur tha tak a nih ngei a beisei tih a sawi a. Pi Lalrithangi thawhrimna leh a lawmman dawnte chu Mizo hmeichhiate chona thar petu ni ngei se a duh tih sawiin, hemi rual hian Sawrkar chuan kuthnathawktute chu a ngaipawimawh tak zet a, an hma hai kuakpui turin a theihna zawnah nasa taka tan lak zel a tum tih mipuite pawhin hriat nawnsak turin a ngen nghal a. Pi Z.T. Lalrithangi chu a kal zelna turah hriselna tha leh thawhrimna nena hlawhtlinna dang tam tak chang chhunzawm zel turin duhsakna a hlan bawk a ni.

Vawiina lawmpuina thilpek hlan tak Pi ZT Lalrithangi hi kum 38 mi niin, thiamna lamah chuan M.A (Sociology) zir chhuak a ni a. A pasal leh an fate 3 nen, chhungkuain Sangau-ah an khawsa mek a. District dangah Strawberry tha taka an thar chhuahte a hmuhin, Lawngtlai lamah hma lak ve a duh a, a sum khawlin strawberry runners 1000 leiin bul a tan a, a enkawl dan leh thil dangah Horticulture Department lam a rawn thin a. Horticulture Department mai bakah, KVK, ATMA leh Agriculture Department-te chuan Pi Lalrithangi hi theihtawp chhuahpuiin, polythene mulch-te, drip irrigation system- te leh water harvesting tanky-te an siamsak a. Amah hi Mizoram Horticulture Fair, June, 2026-a neihah khan Lawngtlai District Best Farmer atan pawh thlan a lo ni tawh a ni.

'FAO 100 Women Heroes in Agrifood Systems and Rural Development' lawmman dawng tur hian Khawvel puma ram 131 atangin nomination 600 chuang lutin, India ram atang pawhin nomination 20 vel a lut bawk a. Heng zawng zawng zingah hian khawvel puma Hmeichhia, an thawhrimna leh inpeknate chhuan lo la awm turte tana entawn tlak nia ngaih, UN-FAO-in a thlan chhuah takte zingah India atangin Pi ZT Lalrithangi leh Mrs. Priyanka Mahesh Shelke, Maharashtra a mite chu an tel ta a ni.

Lawmpuina hun hi Pu C.H.Lalmuanpuia, Director, Horticulture Department chuan kaihruaiin kalkhawmte lawmna thu a sawi a. Pi PC Lalnghahsangi, Project Officer, Centre of Excellence, Thingdawl chuan kalkhawmte hmaah hian he lawmman dawng tura Pi Z.T. Lalrithangi leh Department bakah Ministry lama hotu ten hma an lakdan leh an zinkawng tlangpuite report a pe a. Hemi hnu hian Pi Z.T. Lalrithangi chuan thu a sawi a. Pi Lucy Zaithangpuii, Additional Director, Horticulture Department chuan lawmthu sawiin hun hi a khar a ni.