Nimin (9.6.2016) khan Horticulture Minister Pu P.C. Lalthanliana chuan Hnahlan khua tlawhin grape chingtute harsatna a hmuna a enpui bakah a sutkian dan a sawi pui a. Minister hi Champhai North bialtu MLA, Parliamentary Secretary ni bawk, Pu T.T. Zothansanga leh Horticulture Department Director Pu R. Zotawna bakah Department Officer-te leh Champhai District IPRO ten an tawiawm a ni.
LAD, Social Welfare & Horticulture Minister Pu P.C. Lalthanliana chuan Hnahlan khawtlangin Community Hall-a Minister puala inkhawm an buatsaihah thu sawiin Hnahlana grape chingtute harsatna tawh mek chu Chief Minister-in a ngaih pawimawh thu leh bialtu MLA Pu TT Zothansanga pawhin ngai pawimawhin Assembly House-ah hial a bial mipuite tan ngenna a siam a ni a ti a. Tun tuma Hnahlan khua a tlawh chhan ber pawh CM leh bialtu MLA duhdan anga an harsatna ngaihthlak sak tur leh a sutkian dan dap pui tur a nih thu a sawi bawk. Sawrkar hmalak tum dan puan mai tur a neih rihloh thu sawiin Minister chuan Chief Minister hnenah report mumal taka thehluh a tum thu a sawi a. Mizoram hi India rama state pachhe ber zing ami a ni chungin loneitute tana sum seng hnem ber pakhat a ni reng tih sawiin Minister chuan "Sawrkar chu a ti tha peihte tanpui turin a inpeih reng a ni," a ti bawk.
Bialtu MLA, Parliamentary Secretary Pu T.T. Zothansanga pawhin thusawiin Horticulture Minister-in a bial chhung Hnahlan khuaa grape chingtute harsatna hriatthiampuia a taka a hmuhpui thei chu lawmawm a tih thu a sawi a. Grape huan neitute chu sawrkar hmalakna ngaichang thiam tura chahin Horticulture Minister hova Department hotuten an harsatna an sutkianpui ngei a beiseih thu Parliamentary Secretary chuan a sawi bawk.
Minister hmuahna inkhawm hi Hnahlan khaw VCP Pu K. Khawremsiama'n a kaihruai a. Pu PC Lalrintluanga chuan inlawmna thu sawiin an khaw harsatnate Minister hnenah a thlen nghal a ni.
Horticulture Minister leh Parliamentary Secretary chuan Hnahlan Grape Grower Society Winery an tlawh nghal a. Society member-te hian an harsatna hrang hrangte Minister leh MLA hnenah lo thlenin Department hrang hrang huapa ruahmanna siampui tur leh Ministry of Agriculture hmalakna pakhat, Market Intervention Scheme atanga grape chingtute harsatna chhawmdawl a nih theih nana hmalakpui turin Minister an ngen bawk. Society member-te chuan nikum lama an thar Barrel 20 lai hralh loh a la awm laia kumin atan grape seng hun a hnaih tawh bawk si avangin Barrel tamzawk ngaihtuah sak turin Minister hi an ngen bawk. Horticulture Minister Pu PC Lalthanliana chuan grape chingtute harsatna chu NEDP hmalakna atanga kawng dap pui a tum thu leh barrel pawh ruahman sak a tum thu a sawi a. Grape chingtute harsatna bul ber chu a hralhna market awmloh vang nia a hriat thu leh market chu duh ang anga tihdanglam nghal mai theih a nih loh avangin uluk taka kawng dap a tul thu a sawi bawk. Grape chingtute chu beidawnglo tura chahin kuthnathawktute pui tura sawrkar a inpeih reng thu sawiin Minister chuan, "A tak taka thawktuten sawrkar an dem ngai lova, sawrkar officer-ten an peih phak bak baka an nawr thin thu an sawi zawk a ni," a ti bawk. Parliamentary Secretary Pu TT. Zothansanga pawhin tuna grape chingtute harsatna kan sutkian hian nakin hun thlengin malsawmna a thlen zawk theih nan uluk taka hmalak a tul thu a sawi bawk.
Minister leh MLA te hian grape chingtute harsatna an ngaihthlak zawh hian grape huan a hmunah an tlawh bawk.
Hnahlanah hian in 700 vel awmin chung zinga in 500 zet chu grape huan neia eizawng an ni a. Hnahlan khua hian kum khatah Grape quintal 5000-7000 vel an thar thei a. Grape chin avang hian Hnahlan khawtlang hian ramngaw humhalh kawngah pawh chak takin hma an sawn tawh laiin tuna an harsatna tawh avang hian mi tam takin lo vat lehin ramngaw an thiat leh nual tawh a. Horticulture Minister leh bialtu MLA ten an harsatnate a hmuna an enpui a, chhawmdawl tur an dap pui avang hian an lawm hle a ni.
