Vawiin khan Sports & Youth Services Minister Pu Zodintluanga’n Ramhlun Indoor Stadium -ah St Joseph Higher Secondary School zirlai tithate lawmpuina inkhawm a hmanpui.

Pu Zodintluanga chuan kum tam tak chhung result tha tak nei thei St Joseph Hr.Sec.School fakin zirtirtu, zirlai leh nu leh pate tan rualna vang a ni, a ti. Zirlai pass thar te chu puitlin zir mek, kalna tur thui tak la nei an nih inhria a inthlahdul lo turin a chah a. Nakin lawkah sawrkar emaw kohhran emaw khawtlang emaw kaltlanga ram rawngbawltu an la ni dawn tih hriaa theihtawp chhuah turin a fuih a ni. Minister chuan Mizote chu zirna kawngah hma kan sawn viau laiin khawtlang nunah hmasawnna tur tam tak kan la nei a, zirlaite chuan ngaihsan tur dik an ngaihsan a, ngaihhlut tur dik an ngaihhlut a tul tiin zirtirtuten thil tha an zirtir te vawng tlata nunpui turin a sawm a ni.

St Joseph Hr. Sec. School hian 2016 High School Leaving Certificate Exam-ah an zirlai 57 te an pass vek a, Distinction 11 an awm. Higher Secondary School Leaving Certificate (HSSLC) Exam ah Arts leh Commerce ah za a za pass in Science ah 99% an pass a. Commerce ah hian an zirlai Lalhruaitluanga Chhakchhuak chuan palina dinhmun hauhin Science Stream ah Lalrammuanpuia chuan mark 100 ah 99 hmuin Mathematics topper a ni.