865/2024-2025

Aizawl, 19.06.2024: Horticulture Minister Prof. Lalnilawma chuan vawiin chawhma khan Aijal Club Park-ah Horticulture Fair 2024 chu a hawng. He Fair hian ni thum chhung (19th - 21st June, 2024 thleng) a awh dawn a. Thei, thlai, pangpar leh a kaihhnawih hrang hrang, processed food nen a vaiin Stall 202 an inpho a ni.

Horticulture Fair hawnna inkhawm hi RB McCabe Hall, Aijal Club ah neih a ni a. Hetah hian khuallian Horticulture Minister chuan Horticulture Fair buatsaih a ni leh thei chu lawmawm tiin, fair hlawk tak a nih ngei a duhsak thu a sawi a. Minister chuan Horticulture Fair chu Horticulture Department leh an 'partner' kuthnathawktute tan kawng tam taka hlawkna thlentu nia a hmuh thu a sawi a. Thawhhona tha siamtu a nih bakah kuthnathawktute tana Department hmalakna rahchhuah mipuiin an lo hmuh a, an lo hriatpui theihna hmanrua tha tak nia a hriat thu sawiin, mipuiin heng hmalakna an lo hriatpui hian a thawktute tan phurna thar petu a nih thin thu a sawi bawk. Minister Prof. Lalnilawma chuan state pawn ah Mizo thei, thlai leh pangpar thar te phochhuak turin hma lak a nih mek thu a sawi a. Hralhchuak turin potential nei tha hle in, a market luhchilh dan kawng hriat a pawimawh thu a sawi.

Minister Prof. Lalnilawma chuan Best Horticulture Farmer lawmman chu mi 11 hnenah a sem nghal a. Kuthnathawktu hlawhtling lawmman la zingah kum 60 chuang mi pahnih an awm chu fakawm a tih rualin thalaite tan chona lian tak a ni, a ti a. An zinga MCA zir zo hmeichhia in farming hna eizawnna atan a thlang a, hlawhtlinna tha tak a hmu chho chu chhuanawm a ti bawk a ni.

Khuallian hian Horticulture Crop Calendar a tlangzarh nghal a ni. He Calendar hi kuthnathawktute tan a siam niin, thla bi a thlai chin theih leh chin hun te, natna awm thei leh a enkawl dan nen a chuang a ni.

He hunah hian Thenzawl Horticulture College Dean Dr. Shri Dhar pawh telin thu a sawi a. Mizoram chuan thei leh thalai thar sawngbawl (food processing) lamah potential nei tha a tih thu a sawi a. Thawhhona tha tak neiin Mizoram chu horticulture ah hmasawnpui zel a duh thu a sawi a ni.

Vawiina lawmman sem, Best Horticulture Farmer atan hian Horticulture Technology, Infrastructure, components, scheme, etc. hmang tangkai leh hmasawnna nei thate thlan thin an ni. Khuallian in lawmman hi an hlan a ni. Lawmman latute chu hengte hi an ni:


1) J. Lalhruaizela, Lamchhip, Aizawl District 
2) K. Thandawla, N. Lungpher, Siatual District
3) Lalremsiama, Zawlpui, Lunglei District 
4) FJ Thangliana, Cherhlun, Hnahthial District 
5) Lalduhsangi, Diltlang South, Lawngtlai District 
6) Lalbiakkimi, Amobyu 'Ch' Siaha, Siaha District
7) C. Lalngaihsaka, Serchhip Bazar Veng, Serchhip District 
8) Lalruatkima, Khawhai South, Khawzawl District 
9) M. Kamdingliana, Durzawl zau, Selam, Champhai District
10) Vanlalkunga, Lengte Vengthar, Mamit District 
11) Lallawmkima, Lungdai Hmar Veng, Kolasib District 

Horticulture Fair hawnna inkhawm hi Horticulture Secretary Pi K. Lalrinzuali chuan kaihruaiin, Additional Director Pi M. Vanlalzami hnen atangin Technical Report ngaihthlak a ni a. Horticulture Director Pu C.H. Lalmuanpuia pawh he hunah hian telin, Additional Director Pu L. Lalhmingmawia Pachuau chuan lawmthu sawiin hun a khar a ni.

Kumin Horticulture Fair ah hian stall 202 - pangpar stall 130, thei tiak stall 55, pot stall 9, leitha stall 3, theitui/pickle stall -5 an awm a ni. Mizorama thei leh thalai chi hrang hrang chingtute, pangpar chingtute leh a zuar thinte, thei leh thalai atanga ei tur vawn that theih a siam lama tui mite pualin Horticulture Department chuan kum 2012 atang khan Horticulture Fair hi a lo buatsaih thin a. Thlai chingtute leh zuar thinte tan "Buyers & Sellers Meet" lian tak a ni chho mek zel a ni.

Kum 2012 atanga 2023 thlenga stall neituten an hlawh chhuah tawh zat chu Rs. 319,40,606 a ni a. Hripui leng avangin Kum 2020 leh 2021 khan fair hi buatsaih a ni a. Kum tin a sum lakluh dan chu hetiang hi a ni:

2012: Rs. 17,39,306 (Stall 57)
2013: Rs. 22,90,367 (Stall 75)
2014: Rs. 12,47,142 (Stall 70)
2015: Rs. 17,31,030 (Stall 84)
2016: Rs. 34,36,520 (Stall 103)
2017: Rs. 45,97,415 (Stall 140)
2018: Rs. 44,94,060 (Stall 172)
2019: Rs. 66,41,330 (Stall 219)
2022: Rs. 24,00,188 (Stall 172)
2023: Rs. 33,63,248 (Stall 177)

Attachment

  • Loading attachment...