866/2024-2025

AIzawl the 19th June, 2024 : Misual leh dan bawhchhiate hremna dan thar (Major Criminal Law) - Bharatiya Nyaya Sanhita (BNS), Bharatiya Nagarik Suraksha Sanhita (BNSS) leh Bharatiya Sakshya Adhiniyam (BSA) chu July 1, 2024 atang hian India ram pumah hman tan a ni dawn. BNS hian Indian Penal Code, 1860 a thlak ang a, BNSS hian Code of Criminal Procedure, 1973 a thlak ang a, BSA hian Indian Evidence Act, 1872 a thlak ang. BNS hian Section 358 a nei ang (IPC in Section 511 a nei). Dan bawhchhiat theihna chi 20 belh niin, lung in tan theihna hi 33-a tihpun a ni bawk. Vantlang hna thawh (community service)-a inhrem theihna tur dan bawhchhiatna chi ruk dah belh a ni a, inhrem ngei ngei ngaihna chi 23 dah belh a ni bawk. BNSS hnuaiah hian Police-in mi an kawl theih chhung hian dan bawhchhiat azirin ni 15 atangin ni 90-ah tihpun a ni. BNSS hian Section 531 a nei bawk (CrPC ah Section 484). Tluang tak leh harsatna lian tham awm lova heng dan thar pathumte hi hman a nih theihna atan Mizoram Police chuan theihtawp a chhuah a ni.

  • Heng Criminal Law tharte hi District leh Unit hrang hranga Police ten an hriatthiam leh an bel theihna turin theihtawpin hma lak a ni a. Training Branch, PHQ chuan BPR&D, Govt. Mizoram Law College, Mizoram Forensic Science Laboratory te pawh hemi kawngah hian a thawhpui bawk a ni. Police mi leh sa, Judicial mi te leh Sawrkar Official te pualin hemi thilah hian Mizoram University nen MoU ziah a ni a, a taka hma lak chhoh mek a ni bawk.
  • Dan thar hman chungchanga hmalakna atan hian Mizoram Police hnuaiah Committee pawimawh panga, 1) Legal Issues, 2) Technology Upgradation, 3) Training, Digital Investigation leh 5) Financial Implication te din a ni a. Heng Committee te hian thil tul leh mamawh hrang hrang te zir chiangin, heng dan thar hi hlawhtling taka hman a nih theiha atan Dt. 20.3.2024 khan sawrkarah Rs. 13.4 Crores (vaibelchhe 13.4) hmanna tur an thehlut tawh a ni.
  • NCRB atanga Technical Team lo kal ten offline CCTNS system-ah heng dan thar hmanna tur patch hi hlawhtling takin an rawn test tawh a, Knowledge Partners-te hnenah training pawh pek niin Police Station tinah hmang nghal thei turin intirhchhuah vek a ni tawh bawk.
  • SsP Aizawl, Champhai, Lunglei, Lawngtlai leh Saitual te chu dan bawhchhiatna lianthamah uluk taka crime scene videography pawh ti tan turin thu pek an ni bawk.
  • Mipui nawlpui leh Police mi leh sa ngei te tan pawha inzirna turin heng Criminal Law thar atanga a pawimawh zual lawr khawmin video siam a ni a. Lehkhabu leh thuziak te pawh siam niin hmun hrang hrangah thawn darh a ni. Tin, Case IO te hman tur form Delhi Police in an siam te, Police Organisation dangin FAQ an siam te pawh Mizoram mila siam danglam niin Unit tinah thawn darh a ni bawk.
  • Mizoram Police chuan Mobile Forensic Van pali (4) lei tawhin heng District Headquarters viz. Aizawl, Lunglei, Champhai leh Kolasib ah te hian a dah tawh a. Mizoram Forensic Science Laboratory chuan tunah hian Mobile Forensic Van sawm (10) dang lei turin hma a la leh mek a, rei lo tea lo thleng mai tura ngaih a ni. Tin, heng Forensic Vehicle te hi a thiamin an enkawl a ngaih avangin hetiang lama thiamna nei (trained forensic person) lirthei pakhat atan mi pali zel la thar turin sawrkarah dilna thehluh a ni a. Hemi bakah hian District Mobile Forensic Unit panga, Aizawl, Lunglei, Champhai, Kolasib leh Lawngtlai tan din turin rawtna thlen a ni tawh bawk.
  • District tin SsP ten biak in, zirna in leh tlawmngaipawlte hnenah dan thar hman chungchanga inzirtirna Mizoram hmun hrang hrangah an nei bawk a ni.