867/2024-2025

Dated: Aizawl,the 19th of June, 2024: Vawiin chawhnu dar 4:00 khan Pu Lalnghinglova Hmar, Minister of State, Sports & Youth Services Dept, Aizawl West-II bialtu MLA ni bawk chuan a office chamber-ah a bial chhung atanga HSLC leh HSSLC 2024 a tithate lawmpuina hun a hmanpui a, top 10 a lang mi pahnih hnenah laptop pe in, subject topper mi pakhat hnenah tablet a pe.

Sports Minister hian zirlaite lawmpuina leh fuihna thu sawiin, tuna an hlawhtlinna chu thil ropui leh lawmawm tak ni mah se a tawpna a la ni lova, kalkawnga kal mek an la ni a ti a. Bul an tanna chauh niin eizawnna tling thiamna tak tak an neihna tura an inchherhriamna chauh a la nih thu a sawi. Eizawnna ngialnghet neih piah lamah, midangte eizawnna siamsaktu ni thei ngei turin duhsakna a hlan nghal a ni. Aizawl West-II huamchhunga zirna in te dinhmun chu zirchian mek a ni tih sawiin, a bial chhungah zirnain hma a sawn nan theihtawp a chhuah mek tih a sawi bawk.

Aizawl West-II huamchhung atang hian Lallawmsangi d/o Lalsangliana, Dinthar chu St. Joseph HSS atangin HSLC 2024 ah pakuana a ni a. Science subject ah full mark a hmu bawk. C. Lallawmawma s/o Robert Lalthanpuia, Tuikual North chu Synod HSS atangin HSSLC (Arts) ah palina niin, Lalmalsawma s/o Laltanpuia, Kanan veng chu St. Joseph HSS atangin HSSLC (Arts) ah Public Administration ah topper a ni bawk.