647/2025-2026

Aizawl, 29th May 2025: Vawiin khan College of Veterinary Sciences and Animal Husbandry, CAU, Selesihah 'Pre-Kharif Viksit Krishi Sankalp Abhiyan Campaign' hawnna neih a ni a. He hunah hian Pu C. Lalsawivunga, Hon’ble Minister, Horticulture, Animal Husbandry & Veterinary Department chu khuallian niin Pu P.C. Vanlalruata, Hon’ble Minister, Agriculture & Farmers Welfare Department chu khual zahawm a ni a. Pi Ramdinliani, IAS, Special Secretary, Agriculture & Farmers' Welfare Department chuan inkhawm hi a kaihruai a ni. Viksit Krishi Sankalp Abhiyan Campaign hawnna inkhawm hi KVK Aizawl; College of Veterinary Science & Animal Husbandry, CAU; Indian Council of Agriculture Research (ICAR), Kolasib leh Govt. of Mizoram te tangkawpin an buatsaih a ni.

Hun kaihruaitu Pi Ramdinliani, IAS, Special Secretary, Agriculture & Farmers' Welfare Department chuan kalkhawmte lawmna thu sawiin Sawrkar laipui hnuai a hmathatna te, a dawngtu tur dik tak leh a nihna tur tak a hman a nih theih nan Scheme awmte zirchian leh hamthatna a ken tel kan hriatchian a pawimawh thu a sawi a. Chumi tur chuan 'Viksit Krishi Sankalp Abhiyan' kaltlang hian Mizoram chhunga khaw 737 a kuthnathawktu mi 115200 te hnen ah, hemi kawnga thiamna bik nei Team 24-te chuan ni 15 chhung zirtirna an pek tur thu a tarlang bawk a ni.

Khuallian Pu C.Lalsawivunga, Minister, Horticulture Department chuan kum 2047 hma ngeia India chu ram hmasawn leh intodelha siam chu Sawrkar laipui hmathlir a nih thu tarlangin 'Viksit Krishi Sankalp Abhiyan' chu he hmathlir tihlawhtling tur a hmalakna pawimawh tak a nih thu a sawi a. Kuthnathawktute chu hemi kawnga thawktu pawimawh berte an nih avangin Pre Kharif Campaign kalpui chhung hian, mithiamte kaltlangin an hriatna leh theihna tihpun hna kalpui a nih tur thu leh khawvel thiamna tha leh thar ber berte tangkai taka an hman theih nan zirtir an nih tur thu a sawi. Horticulture Minister chuan hmasawnna tehfung pawimawh tak chu intodelhna a nih thu sawiin chung zingah chuan ei leh bara intodelh a pawimawh hle thu a sawi a. Ei leh bara intodelhna nei tura thawktu pawimawh ber chu kuthnathawktute an nih thu sawiin kuthnathawktute thiamna leh theihna tichak a tipung tur chuan Sawrkar department hrang hranga mithiamte kaihruaina a tul thu a sawi a. Kuthnathawktute ban phakah, an mamawhna zawna kaihruaitu tur mithiamte an awm a tul thu a sawi.

Pu C.Lalsawivunga chuan India rama state hrang hrang ruala Mizorama hman tan tur a tlangzarh 'Viksit Krishi Sankalp Abhiyan' kalpuina chuan ei leh bara intodelhna kawngah leh hmasawnna kawngah rahbi thar thlentu a nih ngei a beisei thu a sawi a. He Campaign hi a hlawhtlin ngei theih nan Krishi Vigyan Kendra, Central Agriculture University leh State Sawrkar hnuai a Agriculture leh a kaihhnawih department hrang hranga thawktute chu duhsakna a hlan bawk a ni.

Khual zahawm Pu PC Vanlalruata, Minister, Agriculture & Farmers' Welfare Department chuan kuthnathawktute dinhmun chawikan a nih theih nan Sawrkar department hrang hranga kan mithiamte hmang tangkai a, Sawrkar laipui scheme tihhlawhtlin chu 'Viksit Krishi Sankalp Abhiyan' thil tum pawimawh tak a nih thu a sawi a. Kuthnathawktute ban phaka tunlai thiamna tha leh thar lam chhawpchhuah leh tangkai taka a hman dan inzirtirna pawh a ken tel thu a sawi a. He Campaign hlawhtling tak a kalpui a nih theih nan kuthnathawktute hmasawnna tura thawktu department hrang hrang thawh hona a pawimawh thu a sawi bawk a ni.

He campaign-in a tum ber chu ngawrh lehzuala department hrang hrang ten scheme tha tak tak an kalpui thinte loneitute hnena hriattir te, thlai chin dan tha zawk, thlai chi tha zawk leh tunlai thiamna (modern technology) nasa zawka hman tangkai a nih theih nana inzirtir te, sik leh sa inthlak danglamin a  khawih chhiat theih loh tur (climate resilient) thlai chin dan mipuite hriattir te bakah kawng hrang hranga sawrkar leh loneitute thawh hona tichak tura hmalaknate a huam a ni. 

Pre-Kharif Campaign hi May ni 29, 2025 atanga June ni 12, 2025 chhung hian neih tur niin thlasik dawnah Pre-Rabi Campaign (thlasik campaign) neih leh a ni ang. India ram puma Distirict 700-a khaw 65000 tuam tura ruahman a ni a; loneitu mi vaibelchhe 1.5 te tlawh chhuah tum a ni. Loneitute tlawh chhuaka zirtirna te pe tur hian mi thiam rualte chu pawlah (team) insiamin an feh chhuak dawn a ni.

Mizoramah chuan khaw 737-a loneitu, mi 1,15,200 te tlawh chhuah tura ruahman a ni a. Team hrang hrangah inthenin lo neih lama tawnhriat nei leh mi thiam hrang hrang- KVK, ICAR, FPO, SHGs, NGOs, Progressive farmers, Rural Youth, Entrepreneurs, Bank, adt. atangte hian an tel dawn a ni.

He Campaign atan hian topic hrang hrang - Soil Health Studies, Climate Resilience Farming, Mushroom Cultivation, Composite Culture, Integrated farming, Vermicompost,  Animal Health, Fertilizer, Agriculture Drone Demonstration leh a dangte a awm dawn a ni.

He Viksit Krishi Sankalp Abhiyan Campaign hawnnaah hian Agriculture line department hrang hrang atangin mi pawimawh te, Deputy Commissioner te  bakah loneitu te, NGO te leh zirlai eng emaw zat an kalkkhawm a, Dr. Sunil Doley, Joint Director, ICAR, Kolasib chuan lawmthu sawiin kalkhawmte hi a thlah a ni