648/2025-2026

Dated Aizawl, the 29th May, 2025:  Vawiin khan Social Welfare Minister Pi Lalrinpuii chuan MZU Auditorium-ah ni hnih awh, khawvel pum huapa ruihhlo hmansual chungchang zirhona, ‘International Conference on Substance Use Disorder' (ICSUD 2025)  chu a hawng a. He hun pawimawh tak hi  School of Medical and Paramedical Sciences, Mizoram University hnuaia Department of Clinical Psychology-ten an huaihawt a ni.

Social Welfare Minister Pi Lalrinpuii chuan Conference puala Souvenir buatsaih a tlangzarh hnuin hawnna thuchah a sawi a. Ruihhlo hi Mizo hnam hmasawnna daltu lian tak a ni, a ti. Tunlai kan hun tawn mek leh ruihhlo do kawnga sawrkar hmalaknate tarlangin, ruihhlo chuan taksa leh rilru a tichhe nasa hle a. Ruihlo dona kawngah hian kan tanrual tlan a pawimawh tak zet tih a sawi. MZU-in hemi kaihhnawih zirhona International Conference hial a buatsaih chu lawmawm a tih thu sawiin, hmalakna sawt zawk leh tha zawkte sawihona leh zirhona engah lo chhuak thei ngei se tih an beisei a ni, a ti.

Dr. Lalhriatzuali Ralte, Social Welfare, Women & Child Development Department Director pawhin ruihhlo dona kawnga Social Welfare Department hmalakna hrang hrangte a tarlang a. Ruihhlo dona leh ruihhlo ngaite enkawlna kawngah mithiam, khawtlang mipui, kohhran leh sawrkar thawhhona pawimawhzia a sawi bawk.

International Conference on Substance Use Disorder-ah hian India ram chhung leh pawn atangin mithiamte leh ruihhlo ngaite enkawlna lama thawktute chuan conference thupui, 'Global Perspectives, Local Challenges and Integrated Solution’ hmangin zirtirna an pe dawn a. School of Medical and Paramedical Sciences, MZU-in inthlunzawmna a neihpuite - Zoram Medical College & Hospital (ZMC&H), Mizoram College of Nursing (MCON), leh Regional Institute of Paramedical and Nursing Sciences (RIPANS)-a zirlai leh zirtirtute bakah Mizoram chhung leh pawn atanga zirlai leh mithiamte pawh he hunah hian an tel dawn bawk a ni.

Conference hawnnaah hian Prof. Dibakar Chandra Deka, MZU Vice Chancellor chuan conference chhimtute lawmna thu a sawi a. Prof. Zokaitluangi, Dean, Conference Director ni bawk chuan sawm bikte hnena lawmna thilpek a hlan a. Dr. M. Sandhyarani Devi, Convener chuan conference thupui a sawi hawng a. Organizing Secretary Dr. Lalnunpuii chuan lawmthu sawiin hun tawp a khar a ni.