Vawiin chawhma khan Horticulture Minister Pu PC Lalthanliana chuan sawrkar laipui Rashtriya Krishi Vikas Yojana (RKVY) Scheme kaltlanga cheng nuai 20 senga sak Plant Health Clinic cum Conference Hall Lungleiah a hawng. Plant Health Clinic cum Conference Hall hi Lunglei Chanmari Venga Divisional Horticulture Office Building chhawng chung berah sak a ni. He hunah hian Lunglei West bialtu MLA Pu Chalrosanga Ralte, sawrkar official-te, MJA Lunglei hruaitute leh tlawmngai pawl hrang hrang aiawhte an tel.

Pu PC Lalthanliana chuan Plant Health Clinic cum Conference Hall chu kuthnathawktuten tangkai taka an hman ngei a beisei thu sawiin thlai eichhetu rannung leh natna hrang hrang laka ven leh enkawl kawngah nasa takin hmasawnna a thlen dawn a ni, a ti a. Horticulture Department hnathawktute thawhrimna leh inpekna chu fakawm a tih thu sawiin Department hmalakna hrang hrang chuan kuthnathawktute tan eizawnna rahbi nghet a tuk teuh tawh a, a la tuk chho zel dawn bawk a ni, a ti a. Horticulture Minister chuan kuthnathawktu te hi Sawrkar in a duhsakin a ngai pawimawh a, an tan inbuatsaihna leh remruatna tha tak tak a siam thin a, chutih rualin a chhawr tangkaitu tur kuthnathawktuten hman tangkai nachang an hre lo vang tih a hlauhawm hle a ni, a ti a. Department hmalaknate hlawhtlinna chu kuthnathawktute ah a innghat thui hle a, tunlai khawvel changkang chho zel mila an inher danglam thiama, technology thar te hmang tangkaia kalphung thar an zawh a tul a ni, a ti a.

Kuthnathawktute thlai tharte tha taka lak khawm leh hralh chhuahna atan Cold Chain System buatsaih mek niin hemi atan hian Sawrkar Laipui atangin cheng nuai 600 hmuh tawh a nih thu Minister chuan a tarlang a. He Cold Chain System ah hian Sairang, Lunglei, Serchhip, Kolasib, Mamit leh Khawzawl ah te Cold Storage Building sak a nih dawn bakah Refer Van panga (5) leh Pickup Truck panga (5) an service dawn bawk a ni, a ti. Kum reilote chhungin Horticulture Department hmalakna hlawhtling engemawzat hmuh theih leh tarlan theiha a awm chu lawmawm a tih thu sawiin India hmarchhaka a hmasa ber Indo-Israel Centre of Excellence For Fruits Lungleia hmalaknate, NEDP hmalakna hnuaiah thal zikhlum (off-season cabbage) leh thal tomato thahnem tak tharchhuah a nih thu te, Thenzawla Horticulture College building chu sak zawh tep a nih thu te leh kuthnathawktute tharchhuah dahthatna tur Transit Godown Mizoram hmun hrang hrangah Rs. 11 crores senga sak tan thuai anih thu te a thusawi ah hian Minister chuan a tarlang bawk a ni.    

Hawnna inkhawm hi Pu Vanlalruata Chenkual, Joint Director, Horticulture Department in a kaihruai a. Pu Lalthakima, HEO(Hqrs), Lunglei chuan Technical Report pein Pu Vanlalnuntluanga Renthlei, DHO Lunglei chuan Horticulture Department Lunglei Division-in kawng hrang hranga hmasawnna an neih te leh an hmalakna tlangpuite sawifiahna hun a hmang a. Pu Lalnuntluanga, ADHO Lunglei in lawmthu sawina hun a hmang bawk.

Plant Health Clinic cum Conference Hall hi sawrkar laipui Rashtriya Krishi Vikas Yojana (RKVY) Scheme kaltlanga cheng nuai 20 senga sak niin laboratory hmanrua lei nan cheng nuai 5 dawn a ni bawk a. He Plant Health Clinic laboratory ah hian Horticulture Department mithiamten thlai eichhetu rannung hrang hrang te an zirchian dawn bakah a hun taka thlai enkawl dan tur leh anih ang tur taka enkawl turin kuthnathawktute an zirtir dawn a ni.