Vawiin chawhnu khan Rs. 40,25,000/- senga Champhai Jail veng a field laih thar JH Rothuama Field chu Champhai South bialtu MLA leh NLUP Implementing Board Chairman ni bawk Pu JH.Rothuama'n ribbon chep chatin a hawng.

Bialtu MLA chuan Champhai khawpui mamawh em em Field thar tha tak Jail Vengah hawn a ni ta chu lawmawm a tih thu a sawi a. Sports lama tunhma Champhai hmingthatna neih let leh theihna tura intuaihriamna leh tharthawhlehna anih a beisei thu  sawiin, a hlawhtlinna chu engtia tangkaia hman nge anih tihah a innghat a ni, a ti a. Field tharah chuan Artificial turf phah anih  dawn loh avangin a mamawhtu apiang tan duh hun hunah a hman theih dawn thu a sawi a. A enkawl leh venhim hna chu khawtlang kutah a innghah avangin neitu thinlung pu chunga enkawl  turin a chah a. Bialtu MLA chuan Champhai mipuite chu Field thar tha tak  siam anih chhan hrerenga tangkai taka hmang turin a chah bawk a ni.

Vawiin hun hi Pu C. Lallawmzuala, President, Jail Veng Branch YMA-in a kaihruai a. Pu F. Lalbiaknunga, Vice Chairman, Field Committee in thusawi tawi a nei a. Bialtu MLA nupui Pi Denghmingliani'n Sports bungrua khawtlang hruaitute kutah a hlan a. Pu C. Lallawmzuala'n lawmthu sawina neiin hun a khar a ni.

He field hi kum 2015 thal lai atanga laih tan  niin kum kalta 2017 khan laih zawh a ni a. Field hi tun hma lama Sirte Mual ti a sawi, Soil & Water Conservation ram ni thinah laih a ni a. Field laihna atan hian  MLA Fund Rs.40,25,000/- senral a ni a, field hi a dung metre  100 leh avang metre 58 a ni a. Football khelhna ground metre 85 a thui leh metre 56 a zau siam a nih bakah Volleyball court pakhat siam a ni a. Field sirah hian Assam type Pavillion  feet 24 a thui, feet 10 a zau sak a ni bawk.