Vawiin chawhma khan Women’s Polytechnic Multipurpose Hall-ah Women’s Polytechnic Aizawl chuan Fresher’s Day 2018 an hmang a. Higher & Technical Minister Pu R. Romawia chuan a hmanpui a. Higher & Technical Minister hian Women’s Polytechnic 18th Annual Magazine a tlangzarh nghal a ni.

Khuallian Pu R. Romawia chuan thalaite zingah mahni kut kea din tum an pung nasa chu lawmawm tiin thalaiten kan ram intodelhna atan rilru leh ngaihtuahna an hman nasat a ngai a ni, a ti a. Zirlaite hnenah chuan anmahnia thiamna inphumru haichhuak turin a chah a. Tunlai khawvelah hmeichhiate dinhmun a tha chho zela, a bik takin eizawnna kawngah hmeichhiaten hma an sawn nasa a, an fakawm hle a ni, tiin thiamnate tipungin inrintawkna nen hmalam pan theuh turin zirlaite chu a fuih a. Handloom, textile leh a dangte hmanga sumdawnna chu kan ram nen pawh thil inhmeh tak a ni tiin zirlaite pawhin chutiang lam hawi course chu an zir thu a tarlang a. Thahnemngai takin zirlaite zir thin turin kalkhawmte chu a fuih a. Fresher’s Day nuam tak hmang turin duhsakna a hlan a ni.

Women’s Polytechnic Aizawl hi kum 1998 khan din a ni a. Durtlangah awmin department pali (4) an nei a, chungte chu-

1)Modern Office Management & Practice (MOMP)

2)Electronics & Telecommunication Engineering (ET)

3)Garment Technology (GT)

4)Beauty Culture & Cosmetology (BCC)

Diploma course vek niin kum thum (3) chhung zir a ni a. All India Council for Technical Education (AICTE) pawmpui vek a ni. Tun dinhmunah hian staff 60 leh zirlai 300 vel an awm mek a ni.

Students’ Union Vice President C.Lalawmpuii chuan kalkhawmte lawmna thu a sawi a. Women’s Polytechnic Aizawl Principal Pu F.V.L Biakchhawna atangin thusawi ngaihthlak a ni a. Independence Day 2018 lawmna atana buatsaih Women’s Football Tournament-a Women’s Polytechnic Aizawl aiawha telte chawimawina hun hman a ni. Students’ Union Fin. Secretary Babie C.Lalramhluni chuan lawmthu sawina in hun a khar a. Chawhnu lamah intihhlimna hun hman zui a ni.