3078/2024-2025

Aizawl, November ni 19, 2024: Horticulture Minister Prof. Lalnilawma chuan vawiin khan Mizoram Florists Association leh Horticulture Department tangkawpin a buatsaih Winter Fair cum Flower Show, Aijal Club a buatsaih chu khuallian niin a hawng. He Flower show hian ni li awh in November ni 22 thleng neih a ni ang.

Horticulture Minister chuan Flower Show a lawmman dawngtute hnenah lawmman a sem nghal bawk a. Fair buatsaih chu pangpar lama eizawngte leh a tuimi te tan hlawkthlak tak a nih ngei a duhsak thu sawiin, flower show a lawmman dawngtute chu a lawmpui thu a sawi bawk a. Pangpar chin chu horticulture hnuaia peng pawimawh tak pakhat a nih thu sawiin, kawng hrang hrangah hmasawnna awm zel tura a duhsak thu a sawi a. Mizoram Florists Association te nen chuan Mizoram mawi nan i t thawk ho zel ang u a ti a ni.

He Fest cum show ah hian mipui lei tur pangpar chi hrang hrang phochhuah a nih bakah category hrang hrang (mass arrangement, artistic, ikebana, perennial, seasonal, queen of the show, etc.) ah intihsiakna buatsaih a ni bawk a. He intihsiaknaa a tha thlanchhuahte chu khuallian chuan lawmman a pe a ni. Intihsiaknaah hian entry 97 a awm a ni.

Horticulture Addl. Director Pu Lalhmingmawia Pachuau   chuan he hunah hian thu tawi sawi bawkin, entry hrang hrangte endik a nih dan a sawifiah bawk. Vawiin show atan hian department leh mimal atangin sponsorship hmuh a ni bawk a ni.

Mizoram Florists Association hi November ni 16, 1997 khan din niin Mizoram Society Registration Act hnuaiah kum 1998 khan in an in register a. Mizoram sorkar nen tangkawpin sorkar hmun pawimawh chei leh enkawl hna an thawk thin a. Chung zingah chuan kum 20 chuang Lengpui Airport chhung leh pawn lama pangpar leh plant chi hrang hrang chin leh enkawl a tel a ni.