798/2024-2025

Aizawl 13th June, 2024 : Ministry of Agriculture & Farmers Welfare, Govt. of India atangin Horticulture Department, Mizoram hmalakna hrang hrang te hmuhpui turin, Ni 11th – 14th June, 2024 chhung hian Central Team Member te an rawn kal a, Additional Commissioner, Govt. of India-in rawn hoin Bamboo Processing Centre, Sairang leh Zo-Anthurium Growers Co-operative Society (ZAGCS) Collection Centre, Ramhlun North, Aizawl te tlawh anih hnuah vawiin khan Rb McCabe Hall, Aijal Club-ah Horticulture Minister Prof. Lalnilawma hovin Meeting neih a ni a.  Meeting hi Pu C.H. Lalmuanpuia, Director of Horticulture-in a kaihruai.

Meeting-ah hian District hrang hrang leh Centre of Excellence (CoE), Thingdawl leh Lunglei te atangin Power Point hmangin hmalakna thlir ho a ni a. Horticulture hnuaia Stakeholder hrang hrangte hnen atangin an hmalakna thlir ho nghal a ni.

Horticulture Minister Prof. Lalnilawma chuan Central Team-in Mizoram an rawn tlawh thei chu lawmawm a tih thu sawiin Aizawl mai bakah Serchhip-a Zawlpui lam thlenga an kal thei chu an inpekna fakawm a tiin policy maker te hian an tawn hriat atangin kan ram mil leh mamawh an zir chhuah ngei a rin thu a sawi a.Tuna Department-in Schemes a kalpui mek bakah hian hmasawn lehzual nan puih kan ngaihna lai apiangah min pui a, hmasawnna tur a tanho a tul tih a sawi.

Minister chuan thlai chin lamah chuan kan that tawh viau laiin a sawngbawlna lamah hma min lakpuia, ram pawn lama thawn chhuah tur sawngbawl leh rei zawk dah tha thei tura thiamna te chu kan mamawh chhoh mek a nih thu a sawi. Horticulture hmalakna zingah mau a kan hausakna chu hmang tangkai tur te, resource mapping nei tura hmalak a tul thu sawiin, Minister chuan a theih chinah chuan eng pawh a huam thu sawiin chutiang tur chuan Central lam pawhin hma lo la se a duh tih a sawi.

Dr. Naveen Kumar Patle, Additional Commissioner, Ministry of Agriculture chuan Mizorama Horticulture hmalakna a hmun ngeia an hmu thei chu a lawmthu sawiin Central-a policy duangtu an nih laiin a chhawrtute nen hun hman fo a tul thu te, heng atang hian sorkar policy thar duan a fuh ber thu a sawi a. Tuna India rama Cluster Horticulture Development hmalakna kal mekah Mizoram pawh a tel ve theih thu sawiin, Anthurium cluster, Dragon fruit cluster leh Serthlum cluster te chu hmuh a chakawm thu a sawi a, Central-ah Ministry thar a piang a, Union Agriculture minister thar pawhin Mizoram hi a hmunah rawn hmu ve ngei se tiin hetiang tur hian program pawh siam a tha dawn hle niin a sawi. Mizoram chu dragon fruit ching zingah a rah a tui bik zia sawiin Dr. Patle chuan India ram pum huapa Dragon Fruit Conference Mizoram ah nghah ni thei se, chutiang tur chuan hmalak a rawt nghe nghe a ni.

Central Team lo kal te hian Mizoram thlai chingtute hmalak nan leh hmasawn zel theihna tur atan rawtna te siamin theihtawpa hmalakpui zel an inhuam thu an sawi a ni.

Central Team-te hian nimin khan Centre of Excellence for Vegetable hmun tur Mat-kam, Serchhip District chu tlawhin Mat Zawlpui zau-a huan siamtute nen an huan hmunah inkawmhona hun tha tak an hmangho bawk a ni.