799/2024-2025

Dated Aizawl, the 13th June, 2024: Vawiin khan Chief Minister Pu Lalduhoma chuan Education Department-in HSSLC leh HSLC Examination, 2024 toppers te hnena Chief Minister's Award semna inkhawm, Vanapa Hall a buatsaih chu a telpui a. Dr. Vanlalthlana, Education Minister chu khualzahawm a ni.

Chief Minister hian, topper te chu lawmpuiin lawmman dawng thei khawpa an hlawhtlin chhan chu an taihmak vang a ni.Talent nei tha mahila kan taihmak loh chuan hnehtu kan ni thei ngai lo. Tin, hriselna tha Pathianin a pe che u a, in nihlawh hle. Rev. Dr. Zairema chuan, Sikul tha chu Headmaster an tha tihna a ni, a ti thin a. Sikul enkawltu tha in nei tihna a ni leh bawk a. Thuneitu ber a that chuan chhungkua pawh ram pawh a tha mai thin. Result tha tak tak nei chho zel mahila kan zir dan system erawh hi chu kan inenfiah deuh deuh a ngaiin a lang. A chhan chu Central competitive examah kan tling hlei thei lova; exam ringawt erin kan zir thin em ni aw tih theih a ni. Ka naupan lai chuan lehkhathiam thei, "a vawikhat chhiar a theihnghilh tawh lo" an tih ve hial ka ni a. Mahse chu min sawi thin dan chu a dik lo, lehkha hi ka chhiar taima a, ka zir nasa em em a ni. Sikul luh tirh atangin chu chu ka kalpui a, exam dawnah ka zir nasa vak tawh chuang lo, tiin a lehkha zir lai chanchin naupangte a hrilh a. Hun harsa tam tak paltlanga lehkha a zir dan ngaihnawm tak sawiin; hun hman thiam a pawimawh thu pawh a thil tawn tawh te atangin a hrilh a ni. Chief Minister hian, vawiinah chawimawi tlaka titha te kan chawimawi lai hian kha exam-a pass zo ve ta rih lo te pawh ka hrereng a, lo beidawng reng reng lo turin ka ngen. Vawi hnih khat hlawhchham hi beidawnpui tham chhiatna a ni ngai lova; nasa zawka hlawhtling tura inbuatsaihna mai a ni, tiin pass zo ve ta rih lo zawng zawng te a chah a ni.

Khualzahawm Dr. Vanlalthlana pawhin thusawiin, toppers te lawmpuina a hlan a. Intihsiakna anih tawh chuan mi tlemte zingah pawh a ber nih a har thin a. Zirlai sing chuang zinga a titha ber ni thei in ni hi a ropui a ni. In hlawhtlinna phenah hian thawhrimna leh tumruhna a hmuh theih a, chu chu a entawntlak a, a ngaihsanawm a ni, a ti a. An kal zelna turah duhsakna a hlan. Minister hian zirlaite zingah communication skill leh leadership lam inzirtirna uar deuh deuh tha a tih thu pawh a tarlang.

Inkhawm kaihruaitu Pi Lalzarmawii, Commissioner & Secretary, School Education chuan kal khawmte lawmna thu a sawi a. Pu Lalsangliana, MCS, Director School Education chuan Award an buatsaih chhan leh an kalpui dan a sawifiah. He Award hi School Education department hian kum 11 an lo kalpui tawh a, quality education a awm theih nana sawrkar policy pakhat niin senso tur pawh Budget ah dah thlap a ni.

Chawimawina hlan te chu:

1. HSLC topper: Lalmoipuia Lawmzual S/o H.L Lawmzuala, College Veng; Aizawl, St. Paul's HSS
2. HSSLC topper in Arts: Linden Lalremruatpuia S/o C. Lalrindika, Venghnuai; Aizawl, Oikos HSS
3. HSSLC topper in Commerce: David Lalhminghlua S/o Paul Zakhuma, Champhai Vengthlang, St. Paul's HSS
4. HSSLC topper in Science: Lalramdina Ralte S/o Lalthakima, Mission Veng; Aizawl. St. Paul's HSS te an ni a.

Lawmman hian tangka fai Rs. 50000 leh Citation a keng.

Lawmman semna inkhawm hi Pu Lalhmachhuana, Addl. Director, School Education chuan lawmthu sawiin a khar a ni.