800/2024-2025
Aizawl, 13.06.2024: Vawiin khan Mizoram Pig Producers’ Cooperative Federation (PIGFED) Ltd. chuan Annual General Meeting vawi 29-na Chanmari YMA Hall-ah a hmang a. He hun hi Cooperation Minister Pu P.C Vanlalruata chuan khuallian niin a hmanpui.
Annual General Meeting khuallian Cooperation Minister Pu P.C. Vanlalruata chuan fuihna thu sawiin Mizoramah Society Movement hun rei tak alo thuanawp tawh hnuah, tuaithar a nih theihna tura harsatna hrang hrang kara Society-te hmalakna kal zel a hmuh avangin lawmthu a sawi a; Sawrkar pawhin Society-te pawimawhna hria in, chak zawk a an hmalaknate kalpui a nih theihna turin tanpui a tum thu a sawi a ni.
Mizo Hnam leh vawk vulh chu inzawm tlat a nih avangin vawksa leh vawk chawah kan intodelh a tul a ni tiiin khuallian chuan vawk chaw a intodelh turin Feed Processing Unit din belh a pawimawh thu a sawi a. Thingtlang lama feed processing unit din belh chu thingtlang mite tan cost of transportation tihtlem theihna pawimawh a nih thu a sawi bawk. PIGFED Ltd. chu Modern Meat Shop leh Ran chaw zawrhna Sales Outlet tam zawk hawng thei tura hmala turin a fuih bawk.
Cooperative Society hnuaia farmer-te khaichhuah an nih theihna turin sawrkarin hma a lak mek thu sawiin, intodelhna tura PIGFED Ltd. in project a neihah te sawrkarin a tanpui tur thu Cooperatiion Minister hian a sawi bawk. PIGFED Ltd. chu AH & Vety. Department leh Cooperation Department thlazar hnuaia a awm avanga a vanneih thu sawiin, thawhhona tha a pawimawh a ni a ti a. Federation leh Society-te inkarah pawh thawhhona tha awm zel se a duh thu a sawi bawk. Mumal taka sawrkar hmalakna sum leh paite a kal theihna turin society-te kaltlanga hmalakna a pawimawh tih sawiin, Cooperative movement meichher chhi eng hram hram tute zarah, sawrkar nena thawkhoin, hmasawnna rahbi thar rah kan tum dawn a ni a ti bawk.
He hunah hian Dr. R. Malsawma, Addl. Director, A.H & Vety. Department pawhin kalkhawmte fuihna thusawi sawiin PIGFED Ltd. nen A.H & Vety. Department chu thawhhona tha neiin, Vety Deptt thlazar hnuaiah Office hmun te luah tirin, Animal Feed Plant, Tanhril hmuna Sales & Marketing hna te leh Vawk kah rai (Artificial Insemination) hna te chu PIGFED Ltd. kutah a dah mek tih a sawi a. Thawhhona tha chawinunga zel a, tan tlan zel a pawimawh thu a sawi bawk.
Pu R. Lalremsanga, Registrar, Cooperative Societies, Mizoram pawhin fuihna thutawi sawiin Primary Society te chu Business Oriented society an ni tih hre reng turin a fuih a, vawk vulh chu Mizote tan Business pawimawh tak, tuiawm leh Market tha sa a ni tiin, PIGFED Ltd. chu Mizoram economy chawikang turin a fuih a ni.
Vawiin Annual General Meeting hi PIGFED Ltd. Chairman, Pu J. Larchhuakmawia kaihhruainain chawhma lamah Annual General Meeting 2024 hawnna inkhawm, Annual Report ngaihthlakna leh infuih tharna hun hman a ni a, Chawhnu lamah affiliated Primary Society atanga palai kalkhawm ten Business Session hun hmangin, Official Agenda leh Primary Society atanga Agenda lutte an sawiho a ni.
PIGFED Ltd. Annual Report tarlan danin, kum 2023-2024 chhungin Artificial Insemination Technology hmanga vawk kah rai atangin 41299 vawkte an piang a, a hlut zawng hi ₹ 28,90,93,000 a chhut a ni. PIGFED Ltd. hnuaiah hian Affliated Primary Society 164 lai an awm mek a ni.
Attachment
- Loading attachment...
