1619/2024-2025

Aizawl, the 16th August, 2024: Horticulture Minister Prof. Lalnilawma chuan tukin dar 7:00 khan Directorate of Horticulture Office, Aizawl atangin Sawhthing tâm beihpui thlakna tura Horticulture Department hmalakna, 'Operation Ginger -2024 Fehchhuah Runpui' hnuaia District 4; Aizawl, Serchhip, Hnahthial leh Saitual District-a feh chhuak turte a vai liam a; hetih rual hian District dangte pawhin hemi hnu hian Operation Ginger - Fehchhuah Runpui hi an mahni awmna District theuhah an lo tan ve nghal bawk a ni.

Horticulture Minister Prof. Lalnilawma chuan sawhthing tâm avanga mangang loneitute tanpui tura feh chhuakte chu theihtawp chhuah tura chahin, a hralhna market thlen hma, a chin leh enkawl chhung zawng chu Department kutah thui tak a innghah tlat avangin thlai chinna hmunah ngei loneitu harsatna enfiahin a remchan dan ang zela puih tum a ni, a ti a. Sawhthing quintal nuai 10 chuang thar thei tura beisei a nih thu leh Operation Ginger chu hmalak tawhnate tun aia zau zawka kalpuina tur a nih thu tarlangin, he hmalakna hian sawhthing chingtu harsatna tawkte tanpui turin Horticulture Department thawktute an awm reng dawn tih a entir thu a sawi a. Loneitute pui turin department thawktu a te ber atanga Minister thlenga an inpeih reng thu sawiin, harsatna leh mamawh an neihte inthlahrung hauh lova thuneitute hnena thlen zel turin sawhthing chingtute a chah a ni.

Prof. Lalnilawma chuan Horticulture Department chu Sawrkarin thlai thar lei tura a thlan chhuah 4 zinga 3; Sawhthing, Aieng leh Hmarcha te changtu Department a nih thu leh Hand Holding Policy tihlawhtling tura mawhphurhna sang tak nei a nih thu sawiin, Sawrkar flagship programme tihlawhtling tur leh loneitute beiseina a taka thlen tir tura theihtawp chhuaha thawhhopuiah Line Department dangte a sawm a. Media kaltlanga mipuite hmuh theih tura sawhthing tâm leh thlai enkawl dan inzirtirna neih a ni leh a hlawhtlinna pawh hmuh zel a ni thin chu lawmawm a tih thu sawiin, Mizoram puma sawhthing tâm dova chhuak tur Operation Ginger Team hrang hrangte chu duhsakna hlanin beiseina sang tak nen a vai liam a ni.

Ruahman dan chuan August thla chhung hian sawhthing tâmna khuate tlawh chhuaha, a invenna leh enkawl dan turte zirtirna pek vek hman tum a ni a. Kumin July thla tawp lam atang khan Horticulture Department chuan sawhthing tâm report dawng tanin hma a la nghal thuai a. District tina DHO te'n report an thehluh atanga hriat theih chinah tun dinhmunah sawhthing tâm avangin khua 263 a sawhthing chingtu chhungkaw 25102 awm mekin, heng zinga chhungkaw 6586 te sawhthing hi a tâm tan mek a ni. Operation Ginger 2024 kaltlang hian Horticulture Department-a thawkte chu District tin tuamin an fehchhuak dawn a, heng atan hian sawhthing natnate, a bawmtu rannungte leh a enkawl dan inzirtirna an nei dawn a. Hemi chungchang ziahna lehkhabu sem nghal zel a ni dawn a, a enkawlna damdawite pawh theih ang angin ngaihtuah mek zel a ni.

Mizoram puma Horticulture hnuaia thawk Officer leh Field Staff zawng zawngte mithiamte'n sawhthing tâm enkawl dan zirtirin sawhthing tâmna hmunahte a enkawl dan an zirtir a, media lamahte pek chhuah niin Department chuan hemi kaltlanga zirtirnate tangkai taka hmanga inzir zel turin sawhthing chingtute a chah a; beidawng mai lova mithiamte thurawn anga an sawhthing hmunte tha thlah lova enkawl chhunzawm zel turin a chah a ni.

Vawiina Aizawl atanga 'Operation Ginger 2024 Fehchhuah Runpui' a kal tur Minister-in a vai liam takte hi Dr. Robert Lalrinsanga, Dy. Director kaihhruai Saitual District Team-te, Dr. H. Vanlaldiki, Dy. Director kaihhruai Aizawl District Team-te, Dr. Jenny Zoremtluangi, Dy. Director kaihhruai Serchhip District Team-te leh Pi Emelyne Lalmawipuii, Asst. Director kaihhruai Hnahthial District Team-te an ni.

He hun hi Horticulture Director Pu C.H. Lalmuanpuia chuan kaihruaiin sawhthing tâm beihlet kawnga hma an lak dan leh inpuahchahna dante a sawifiah a. He hunah hian Horticulture Secretary Pi Ramdinliani, IAS leh Department hotute an tel a ni.

Hemi ni hnu hian Horticulture Minister Prof. Lalnilawma chuan Thiak khuaa sawhthing chingtute harsatna tawh dante a hmunah ngei kalchilhin a enfiah a. Tunkar tira damdawi kahin awmzia a nei chu lawmawm a tih thu sawiin, a enkawl leh hmalak zel kawngah mithiamte thurawn ngaichang thiam turin a chah a. Sawhthing tâm a darh zel loh nana theihtawp chhuaha hupbeh a tul thu pawh sawiin, sawhthing chingtute pui turin Horticulture Department chu a inhawn reng thu a sawi bawk.