2894/2024-2025

Dated Serchhip, the 7^th November, 2024: Vawiin khan Prof Lalnilawma, Horticulture Minister chuan Lamlian Dung Zau Dragon Fruit Hmun, Thenzawl a tlawh.

Prof Lalnilawma chuan Lamlian Dung Zaua huan neitute thawhrimzia leh an hmasawnna te chhuanawm a tih thu a sawi a. Kuthnathawktute tana hmalak chu sawrkar au hla a ni a, theihtawp chhuah a kuthnathawktute tana tan lak zel an tum thu a sawi a ni. Food processing lama an hmachhawp sawiin Horticulture Minister chuan dragon fruit sawngbawl dan tur an zawn mek thu leh a powder ang zawnga siam an rilruk thu a sawi a. A sawngbawlna hmun tur din an tum thu leh an ruahhmanna thenkhat te a tarlang a ni. Sawrkar chuan Zau (cluster) ang zawnga hmalak zel an tum thu leh, Lamlian Dung Zau ah pawh sawrkar department hrang hrang te nen tangho a hnathawh an tum dan a sawi a. Mizoram hmun dangah te pawh farmer ten a tak taka hlawhtlinna an neih theih nan Zau dangah pawh hmalak zel an tum thu a sawi a ni. Prof Lalnilawma chuan Lamlian Dung Zau neitute hmathlir leh hmachhawp te tha a tih thu sawiin Tourist Destination tha tak a nih a beiseiawm thu a sawi bawk a ni.

Lamlian Dung Zau Dragon Fruit Hmunah hian kumin chhung khan chhungkaw 48 in dragon fruit quintal 557 an tharchhuak a. A thar chhuak hnem ber Pi Gaby Zosangpuii chuan quintal 21 a thar chhuak a, a rah hi thla 5 chhungin tum 9 a seng hman a ni.  Heng chhungkaw 48, society a tel te hian Local Soda Pvt Ltd te nen inremna thuthlung ziakin an tharchhuah te hi an lo-ah kal chilhin an leisak thin a ni. He hmun hi Mizoram Chief Minister pawhin lo tlawh tawhin, tui lamah leh kawng lama harsatna an neih te chingfel turin ruahmanna a siam a. Mizoram Tourism Department te nen pawh thawhhona an nei tan chho mek a, khualzin mite tana tlawh theih turin Farm Stay siam tumna a awm mek bawk a ni.

District Horticulture Office ruahmannain Lamlian Dung Zaua Dragon Fruit tharchhuaktu farmer te hnenah Minister Prof Lalnilawma chuan citation a hlan a. Dragon fruit thar chhuak hnem ber Best Harvest Award chu Pi Gaby Zosangpuii’n a dawng a, hmasawn ber Most Improved Award Pu Lalhmingmawia’n a dawng a, Pu LP Mawia’n Most Promising Award dawngin, Best Farmer Award chu Pu Ramngaihsanga’n a dawng a ni.

Programme hi Lamlian Dung Zau Society Chairman Pu C Lalrinthanga’n a kaihruai a. Pu Vanlalhruaia, Vice Chairman chuan lawmthu sawiin hun hnung a khar a ni. 

Rural Development changtu Minister Prof Lalnilawma chuan Rural Development hnuaia hmalakna Thenzawl Zote Road a MGNREGA hnuaia hnathawhte a hmunah a en a. Project Director Dr Malsawmtluanga Fanchun, District Horticulture Officer Pu R Lalrintluanga, Sr EE PHE Pu Isaac Lalchhuanmawia leh Serchhip DIPRO Pi Lalnunmawii ten an tawiawm a ni.