2893/2024-2025

2024 Sahmulphah thla ni 7: Vawiin khan Young Mizo Association (YMA), Zotlang Branch, Lunglei chuan Lunglei Zotlanga Integrated Mini Indoor Stadium-ah kum sawmnga an tlin, golden jubilee lawmna hun an hmang a. Lunglei High Powered Committee (HPC) Vice Chairman Pu V. Malsawmtluanga, Lunglei North bialtu MLA chuan Khuallian niin a hmanpui.

Khuallian Pu V. Malsawmtluanga chuan YMA member-te leh khawtlang mipui kal khawmte chu golden jubilee chibai bukin,  Branch YMA hruaitu lo ni tawh leh ni mekte zahna chibai a buk bawk a. Mizoramin Pathian malsawmna a dawn zinga langsar berte zinga mi chu YMA hi a ni tiin, YMA kal tlanga mi dangte tana malsawmna ni zel turin member-te chu a chah a. Zotlang chu khaw hlun, sulhnu ṭha tak nei leh mi ropui tak tak lo chhuah tawh ṭhinna a ni tih tar langin, khawtlang hmasawnna atan sawrkar leh khawtlang mipuite ṭang tlanga hma lakna kalpui zel tum a nih thu a sawi a. Zotlang Integrated Mini Indoor Stadium-a Futsal Ground-ah zan lama inkhelh theih nan HPC sum hmangin eng (flashlight) dah tura ruahmanna a kal mek thu te; chhim lam harsatna ber transformer chhia phai lama siam ngai tawh lo turin, HPC hma laknaa a siamna hmun Zotlanga dah turin Power & Electricity Department te nen ruahmanna siam mek a nih thu te; VC Road pawh PCC concrete tura ruahmanna kalpui mek a nih thu te; Zotlang field laih zauh leh khaw chhunga solar light vuah tum a nih thu te; solar power plant cheng vaibelchhe 200 man tur pawh Zotlanga dah tura ruahmanna a kal mek thu te a sawi a. Mizoram sawrkarin Handholding policy a kalpui mek chu ṭhalaite'n chhawr ṭangkai tum ṭheuh turin a sawm bawk a. YMA Zotlang Branch Golden Jubilee lungphun chu a hawng nghal bawk.

YMA Zotlang Branch golden jubilee lawmna hun hi Branch YMA Vice President Pu Lalramzauva Chinzah chuan kaihruaiin, President Pu Laldingliana Renthlei chuan inlawmna thu a sawi a. Secretary Pu Lalnunkima Khiangte chuan report pein, Lunglei Sub-Headquarters YMA President Pu K. Lalfakzuala'n thu a sawi bawk. YMA hruaitu hluite chawmawina hun hman a nih bakah, souvenir leh hla bu tlangzarh a ni a. Hnam lam (cultural item) thlir ho a nih bakah, zaipawl leh mimal zai te ngaihthlak niin, tlai lamah jubilee lawmna ruai an kil ho bawk a ni.