2892/2024-2025

Aizawl the 7th November, 2024 : Nimin atang khan ni 2 awh ‘Workshop on Leadership Development in the Elementary Schools’ tih chu Conference hall, School Education Complex Aizawl-ah neih a ni a, Education Consultant Rev Dr K.Thanzauva, Special Secretary Pu David Lalthantluanga leh Director Pu Lalsangliana ten an hmanpui.

He workshop-ah hian nimin khan Rev Dr K.Thanzauva Education Consultant chuan thusawiin Elementary school inkaihruainaa chona awm chi hrang hrang a sawi a. Education Consultant chuan khawvel pum huapin zirtirna kalpui dan a danglam tawh a, vawiina zirlaite chuan online course te, virtual classroom te leh ram dang nena programme inchhimtawn te pawh an ti thei tawh a ni a ti a. Khawvel pum inkalpawhna leh inbiaktawnna chuan India ram zirna pawh nasa takin a nghawng a, ei leh bar zawnna leh vantlang nun inzawm dan thlengin sulhnu a nei a ti a, India ramin policy tha tak a neih National Education Policy a taka chantir turin zirtirtuten mawhphurhna sang tak an nei a ni a ti bawk.

He workshop-ah hian Pu David Lalthantluanga Special Secretary School Education leh Pu Lalsangliana Director-ten thu an sawi bawk.

Vawiin khan DEO leh SDEO te team 8-a insiamin Aizawl khawpui chhunga elementary school 18-te an tlawh kual a, chawhnu lamah an thil hmuh te report-in sawihona hun an hmang leh a ni. Inspecting officer-te hian an school tlawh te hi an dinhmun an thlirpui a, an hmasawn dan te, tan lak an ngaihna te pawh zirtirtute nen an sawi nghal a ni.

Vawiin chawhnua sawihona neih leh a ni a, Pu C.Lalthanzira Additional State Project Director Samagra Shiksha-in a kaihruai a, Rev Dr K.Lalthanzauva chuan District hrang hranga thawk Inspecting officer-te chu hmathlir fel tak nei turin a fuih a, hmathlir nei mumal lo tan eng kawngah mah hmasawnna a awm thei lo a ni a ti a. School-a thawkte pawhin lesson plan fel tak an neih chuan hma kan sawn a beiseiawm hle a ni a ti bawk.

He workshop-ah hian District hrang hranga School Education Department hnuaia District Education Officer te leh Sub-Divisional Education Officer-te an kalkhawm a ni.