3747/2023-2024

LUNGLEI; the 9th February, 2024: Nimin chawhnu Horticulture Minister Prof: Lalnilawma leh Pu V.Malsawmtluanga, Vice chairman HPC te chuan Mausen khuaah khuallian leh khualzahawm niin, Farmers’ Meet an hman pui. Nimin Farmers’ Meet hi DHO Office, Lunglei ten Balhla Chingtu pawl( Banana Grower Association) puala a buatsaih a ni a, Programme hi Pu B.Lalzarzova, DHO, Lunglei chuan kaihruaiin, Pu Lalthanthuama, Secretary, Banana Grower Association chuan an pawl chanchin leh an hmalakna te, Balhla umhminna( Banana Ripening chamber) an chhawr tangkai dan te report pein, Pu Zoramthanga, Vice president Mausen Banana Growers’ Association(MBGA) in Ripening Chamber hman dan a entir bawk.

Khuallian Pu Lalnilawma chuan MBGA te chu mi’n Mausen Khua an sawi ve leh an mitthla-a Balhla lang thei tur khawpin tan lo la ru. ZPM sawrkar chuan a taka thawktu te tanpuina kawngah party a thliar dawn lo, a ti.

Pu V.Malsawmtluanga, khualzahawm pawhin fuihna thu tha tak sawiin, MBGA in an Ripening Chamber panna kawng siamsak tura an ngenna chu a ti hlawhtlin tur thu a sawi.

Report a tarlan danin, Banana Ripening chamber hi MIDH (Mission for Integrated Development of Horticulture) hnuaia atanga sak niin,Nikum 30th October,2023 atang khan Balhla Umhmin nan hman tan a ni a. Kar khatah tum 2 umhmin thin niin, vawi khat umhmin nan hian ni 3 a duh a. Vawikhatah Matric Ton 10 a umhmin thei a ni. Tunah hian thla 2 chauh an la hmang hman a, he thla 2 chhung hian Balhla cheng nuai ?10/- man vel umhmin tawh a ni. MBGA member Balhla umhmin ten Tukri khat zelah Ripening Chamber hman man( Maintenance fee) Rs.20/- an chawi ve a, chu chuan Electric Bill te an pe ve a ni.Tunah hrih chuan a market-ah an buai lo hle a, an supply hneh lo zawk a ni. Lunglei leh Lawngtlaiah chiah an la thawnchhuak thei hri thu an report bawk. Mausen a tlawh hma hian Tlawng lui kama Horticulture Dept. hmalakna hnuaia Nul siam pawh Minister hian a tlawh nghal a ni.

Mausen khuaah hian chhungkaw 70 vel an awm a, chhungkaw 29 ten Balhla an ching a ni.