3746/2023-2024

LUNGLEI; the 9th, February, 2024 : Prof.Lalnilawma, Minister of state for PHE,RD and Horticulture chuan ni 7.2.2024 zan khan Lungleia a riah tawh hnuin, nimin zing dar 6:30 atang khan site visit nei leh tanin, a hmasa berah Mizoram mipui tamtak chawmtu, lui pawimawh tak TLAWNG lui hnar SAIREP khawbula mi chu, E-in-C, PHE,Er.F.Liantluanga, Lunglei PHE Official te leh“Project Save Tlawng” hruaitute nen an tlawh. Minister hian Sairep khua chu tlawh nghalin, Sairep khawtlangin Tlawng hnara ramngaw an humhalh dan te mit ngeiin a han hmu a ni. Sairep khawtlang hruaitu te chuan Minister chu an lo lawm hle a, kum 10 chuang kal ta a, Minister pakhat in a tlawh aibak chu an khuaa Minister lut leh hmasa ber a ni thu an lo hrilh a ni. Sairep khawtlang hruaitute chuan Tlawng lui hnara an Ramngaw reserve an humhalh that zia Minister chu lo hrilhin, an VC leh YMA te phalna lo chuan thingtang ro tak ngial pawh reserve area atang hian an lak ngai lo thu an sawi.Sairep ram chhungah hian Tlawng lui bakah heng Lui 5: Lungpher,Suakchhunga Vautui,Zo lui, Thai lui leh Saphai lui te hian hnar an nei bawk a ni.

Sairep khua hian ramngaw an humhalh that avangin tlangchhipa khua awm mah nise, an khaw hnuaia lui atang ten duh tawka tui pump tur an nei a. PHE ten tui pump khawl bun sakin, tui an hnianghnar hle a ni. Khawtlang hruaitute chuan Tlawng hnar ramngaw chauh reserve lo hian, an ramchhung ramngaw zawng zawng pawh reserve vek an duh laiin, kut hnathawka ei zawng deuh vek an ni si avangin harsatna an tawh mek thu Minister hi lo hrilhin, an ramngaw te chu Tlawng lui tan tuihna siamtu pawimawh tak a ni avangin humhalh zel an duh a, tha taka an humhalh zui zel theih nan hmalak pui turin Minister chu an lo ngen a. Minister pawhin Sairep khua chu sawrkarin a ngai pawimawh bik tur thu leh khaw dang te an thik pawh a thiang lo a ni, a ti.

Zobawk khaw mipuite tana Tlawng lui tui titam tura PHE in Recharging Dam Tlawng hnar( zobawk) a siam tum, Court Case avanga chawlh lailawk pawh a hmunah enfiahin, chin fel a nih theih nan Forest Minister te nen an la sawiho tur thu a sawi.

Minister hian AMRUT- 2 Scheme hnuai atanga Demountable Tank : Litre nuai 2 theuh dawng tuizem 5 (Panga), a vaiin litre nuai 10 dawng, Mizoram Polytechnic hmun bun chu a hmunah tlawhin a enfiah a. Chawhnu lamah BDO Lunglei RD office leh High Power Committee, Lunglei Vice Chairman office a tlawh a. HPC  Vice Chairman Pu V.Malsawmtluanga, Lunglei North bialtu MLA ni bawk leh HPC staff ten lo dawng sawngin, HPC  Conference Hall-ah HPC staff te bakah tlawmngai pawl hruaitute nen inkawmhona hun an hmang bawk.