2528/2026-2027

Dated Champhai, the 6th October, 2026 : Vawiin khan Horticulture Department Minister Pu C. Lalsawivunga chuan Circuit House Conference Hall, Champhai-ah District Transformation Programme hnuaia kalpui Project Greenshield a hawng. He project hi MGNREGA, MIDH leh RKVY PDMC scheme-te tangkawpa Champhai District-a kumtluana tomato tha leh tam zawk thar chhuah a nih theih nana hmalakna a ni. 

Khuallian Pu C. Lalsawivunga chuan thu sawiin, Mizoram sawrkar flagship programme Bana Kaih hnuaia peng (component) panga-na, ‘Decentralised Plan’ hnuaia kalpui mek Mizoram District Transformation Programme kaltlanga Tomato chingtu ten hlawk zawk, quality tha zawk, awlsam zawk leh kumtluana tomato an thar theihna tura hmalakna ‘Project Greenshield’ hawn theih a ni chu lawmawm a tih thu a sawi a. He project a hlawhtlinna tura thawktu zawng zawngte – a bik takin Champhai DC Office, District Horticulture Office, Rural Development Department, Irrigation & Water Resources leh Tuipui khuaa Tomato chingtute chungah lawmthu a sawi a ni.

Mizoram sawrkar chuan District tin ten an district-a an ngaihpawimawh emaw an hnufualna emaw phuhru tura hma an lak theih nan Mizoram District Transformation Programme kaltlangin cheng nuai 100 theuh pek a ni a, kan hmalakna a that dan a zirin hei aia tam pawh la pek chhuah zel tura ruahman a ni a. Hei hi hre renga vawiina kalkhawmte leh district dang zawng zawng pawh theihtawp chhuaha hma la zel turin a chah. 

Khuallian chuan sawrkar department hrang hrang te hian mawhphurhna hrang theuh nei mah ila, mipui rawngbawltu kan nih vek avangin tum thuhmun nei kan ni tih in hre thar theuh ila, thawhhona tha leh inpumkhatna tha nen theihtawp I chhuah ho zel ang u, a ti a. Hlawhtlinna chang tur chuan taimakna leh tumruhna nunchhuahpui a pawimawh thu sawiin, loneitute chu he project hi tangkai tak leh hlawk taka hmang turin duhsakna a hlan a. Mithiamte rawn chung zela thlai damdawi (chemical) hman a pawimawh thu sawiin, organic thei ang bera thei leh thlai ching turin a fuih bawk. 

Champhai DC Pu Mohammad Aaquib pawhin thu sawiin, he project a hlawhtlin theih nana hun leh tha thawhtu zawng zawngte chungah lawmthu a sawi a. He project kaltlang hian loneituten tunlai thiamna technology hmangin tomato quality tha leh tam zawk kumtluanin an thar chhuak thei dawn a ni tih sawiin, loneitute chu he project tangkai taka chhawr turin a chah bawk. 

Champhai District Horticulture Officer (DHO) Pi Lalrinchhani chuan technical report a pe a. He Project atan hian loneitu 10 thlan chhuah niin, Greenhouse pakhat theuh an enkawl tura ruahman a ni a. Project Greenshield-ah hian Greenhouse 10 bun niin, Community Water Tank (Cemented) pakhat bakah Individual Water Tank (Pre-Fabricated Geolined Membrane Water Tank under MIDH) 10 bun a ni bawk a. Greenhouse tinah hian Drip Irrigation (RKVY-PDMC) dah vek a ni bawk.

Tuipui VC-in he project atan hmun pek tur an neih loh avangin Tuipui Tomato Association hruaitu Pu Vanlalpeka chuan a ram a pe a. Training leh Inspection hi District Horticulture Office, Champhai chuan a kalpui reng a. Thlai chin turah hian Tomato thlan phawt a ni a, tomato chauh ching loa crop rotation kalpui tum a ni.

Greenshield project hawnna inkhawm hi SDO (Sadar) Dr. Peter Malsawmtluanga’n a kaihruai a, Addl. DC Pu Lalbiakfela’n lawmthu sawiin hun a khar.

Programme zawh hian Minister chuan Passion Fruit Processing Unit sak mek a hmunah kalin a endik.