2529/2026-2027

Lunglei, 2026 Khuangchawi Thla ni 6: Vawiin khan Lunglei District Bawrhsap Pi Navneet Mann hovin a hna thawh pindanah sawrkar official-te, National Highways & Infrastructure Development Corporation Ltd (NHIDCL) hotute leh contractor – ABCI Infrastructures Pvt Ltd leh  BRN Infrastructures Pvt Ltd hotute an ṭhu khawm a. Lunglei District chhunga national highway kawngpui zauh leh siam ṭhat hna kal meka hna thawh dinhmun leh hmachhawpte an sawi ho.

He ṭhut khawmah hian Lunglei District Superintendent of Police Pu Shivam Siddharth leh Assistant Commissioner (Revenue) Pi Jennifer Vanlalhruaii Pachuau te bakah, DIPRO, SDC i/c DDMA leh DC leh Revenue-a thawktute, NHIDCL General Manager (P)-te, ABCIIPL Sr General Manager leh BRNIPL Project Manager te an tel a. Bawrhsap Pi Navneet Mann chuan fur ruahtui a hul chhoh tawh avangin kawng laih leh siam chungchangah chhuanlam a awm thei tawh dawn lo tih sawiin, NHIDCL leh contractor-te chu hna thawhna hun ṭha chu chhawr ṭangkai tur leh ruahmanna fel tak siam a, ṭhal chhunga a tam thei ang ber hna thawh tum turin a chah a. An hna thawh dan tur duan lawkte chu a taka an tihhlawhtlin leh tihhlawhtlin loh vil zui reng a nih dawn thu leh an thawh ṭhat loh chuan a ṭul anga an lakah hma lak zel a nih dawn thu hrilhin, a hma laknate DC hnenah a hun taka hriattir zel turin a chah.

He hunah hian September 2026-a Mizoram Chief Secretary hova NH-54 chungchanga Video Conference Meeting thu rel bawh zui dan leh hmabakte thlir ho niin, meeting-in hma lakna tur a relte chu a hun taka zo thei tura theih tawp chhuah turin contractor-te chu hrilh an ni a. NHIDCL leh contractor-te'n October–December 2026 chhunga NH-54 Package-5, NH-302 Package-A leh NH-302 Package-B huam chhunga hna thawh dan tur Work Plan an duante thlir ho niin, ngaih pawimawh hmasak tur rawt belhte nen ruahman anga a hun taka zo tur leh ṭha taka thawk turin contractor-te chu hrilh an ni a. Leivung paihna tur ruahmanna leh kawng laih avanga vantlang thil (public asset) chhiate siam ṭhatna tur sum pek hmabak chungchangte sawi ho a ni bawk a. October thla tawpah Work plan bawhzui dan leh an hna thawh dan hi DC hovin a hmunah endik (spot verification tih) leh tura ruahman a ni.