2533/2026-2027

Dated Champhai, the 6th October, 2026 : Vawiin chawhnu khan Horticulture Department Minister Pu C. Lalsawivunga chuan Champhai Zotlang Mual-ah October 6 - 16 chhunga neih tur Hnahsin Kut 2026 a hawng. 

Khuallian Pu C. Lalsawivunga chuan thu sawiin, khuanu min pek kan ram mawina, kan hnam ziarang leh ro hlute eco-cultural tourism hmanga kan pholan a, khualzin hip chu Hnahsin Kut-in a tum ber pakhat a ni, a ti a. Hnahsin Kut hmang tura Mizoram chhung district hrang hrang mai bakah State dang leh ram dang aṭanga khualzin an lo kal hi lawmawm a tih thu a sawi a. Champhai District hian hmalakna hrang hrangah hlawhtlinna duhawm tak tak a neih thu sawiin, Champhai Grape Growers’ Society ten an enkawl mek Tlangsam-a winery leh Hnahlan-ah winery tha tak a awm thu a sawi a. Tun kum chhung ringawt pawh hian Champhai Winery hian grape wine litre 75,000 a siam chhuak tawh a, cheng 6,54,00,000 lai an leichhuak tawh bawk a. Hnahlan Winery pawhin grape wine litre 80,000 lai siam chhuak tawhin, heta tanga an sum hmuh chhuah hi cheng 3,00,00,000 lai a nih thu a sawi.

Horticulture Department hmalaknain Champhai District bikah Sapthei tin 375 a zau-ah chin mek a ni a, Khawzawl District ah pawh nasa taka hma lak mek a ni bawk a.  Sapthei kan thar tam hunah process a ngai dawn tih hre lawkin, sawrkar chuan New Champhai-ah Sapthei Processing Unit a din mek a, hun reilote-ah hawn theih a nih tur thu a sawi a. Sawrkar-in a ngaih pawimawh ‘Zau Policy’ hi hlawhtling takin a kalpui theih a ni tih Samthang khua-in Zikhlum hlawhtling taka an chin dan atangin a hmuh theih a ni, a ti.

Sawrkar ngaih pawimawh thlai pali – Sawhthing, Aieng, Hmarcha leh Hmunphiah te zingah Sawhthing chin lamah Champhai District hian hma kan hruai mek a. A vawikhatna atan sawhthing sawngbawlna lian tham Ginger Processing Unit chu Champhai District-a bun turin DoNER Minister chuan thutlukna a siam fel tawh a. A hmunpui atan Mualkawi thlan a ni a, a processing unit te zawk dinna atan Zotlang, Vaphai leh Tualcheng te thlan fel tawh an ni a. Hei hi  project ang chauh ni lovin, hmalakna lian tham zawk mission mode-a kalpui tur niin, ‘Mizo Ginger Mission’ tih hming vuah a ni a. Central sawrkar lamah Ministry pahnih pathum tangkawpin, State sawrkar lamah pawh Department engemaw zat- Horticulture, Agriculture, Cooperation, RD te tangkawpin kan thawk ho dawn a ni, a ti a.

Khuallian chuan Hnahsin Kut hi hlawhtling taka hman a nih theih nan Mizo Ginger Mission sum atangin Horticulture Department chuan cheng nuai 20 lai an thawh thu sawiin, he kutpui hun chhung hian Mizo Ginger Day hman a nih dawn thu a sawi a. Kan rama tourist lo kal tawh ten kan ram nuam an tiin Mizo mipuite thatna leh kan hawihhawmna te an hmuh hmaih hauh lo a, kan hnam zia tha tak hi chhawm nung zela, khualzin mite chungah that chhuah zela, Zonun ze mawi lan tir zel turin mipuite a sawm a. Vawiina kalkhawm zawng zawngte leh Kut rawn la chhim zel turte hlim taka hun hmang turin duhsakna a hlan a ni.

Nikum 2025 khan Kut hma September thla tawp atangin Hnahsin hmun tlawhtu khawtual mi leh khualzin tam tak an awm tan tawh a. Chutiang zawng zawng nena chhutin Hnahsin Kut chhimtu/tlawhtu (footfall) hi mi 1,20,000 vela chhut a ni a. Kut tawp zan Mualnuam concert hi mi 42,000 velin an chhim nia chhut a ni bawk. 

Hnahsin Kut 2025 venue chhung stall neitute inhralhna hi Nuai 200 vel a ni a. Hotel, Guest House leh Homestay-te sum lakluh hi Nuai 140 vel niin, Khualzin an thlen zat hi Mizoram chhung mi 5100, Mizoram pawn atangin mi 805 leh India ram pawn mi 56 a ni. Hnahsin Kut avanga Champhai leh a chhehvel bawra sum che vel leh rawn lut hi Nuai 2000 (Vaibelchhe 20) vel nia chhut a ni.

Hnahsin Kut hawnna inkhawmah hian Pu Lalrinmawia Hnamte, Treasurer, Organising Committee chuan inlawmna thu a sawi a. Pi Mimi Lalhminghlui, General Secretary, Organising Committee chuan lawmthu sawiin hun a khar.