2534/2026-2027

Kolasib, 6th October, 2026: Vawiin chawhnu khan Asian Games Women's Hockey Gold Medalist Nl. Lalremsiami Hmar chu Kolasib-ah ropui taka lo hmuah a ni a . Sorkar official-te, khawtlang hruaitute, tlawmngai pawl (NGO) hrang hrangte, infiamna discipline hrang hrang hruaitute leh Kolasib mipui thahnem takin Hmawngkhawthlir-ah lo hmuakin, Kolasib khawpui fanpui a nih hnuah Diakkawn YMA Hall-ah Deputy Speaker Pu Lalfamkima leh South Tuipui bialtu MLA Pu Jeje Lalpekhlua te hovin a lawmna inkhawm ropui taka hman zui a ni.

Khuallian, Deputy Speaker Pu Lalfamkima chuan Kolasib District leh Zoram tana ni chhinchhiahtlak tak a nih thu a sawi a. "Mizoram hming tithaa India ram mai ni lova khawvel dengchhuak khawpa dinhmun min thlenpuitu chu Nl. Lalremsiami hi a ni. Asian Games chauh ni lova Olympic khel thei tura dinhmun a han chang hi a chhuanawm takzet a ni," a ti. Nimin lama Chief Minister Pu Lalduhawma hova R. Dengthuama Indoor Stadium, Aizawl-a ropui taka hmuah a nih thu sawiin, Diakkawn GS Playground chu Lalremsiami hming chawia hockey khelmuala siam a nih tur thu  a sawi bawk.

Deputy Speaker chuan, Lalremsiami chu a mi hriat chian leh veng khata khawsa an nih thu a sawi a. A hlawhtlinna phenah a taimakna leh a tumruhnate chu a hriat thiampui thu sawiin, tuarchhelna leh tumruhna avanga hlawhtling a nih thu a sawi a. Remsiami hlawhtlinnaah hian mipaten tan kan lak thar a pawimawh thu a sawi a, Arjuna Award dawng thei khawp dinhmun a ding chu lawmawm a tih thu a sawi. Kolasib leh Zoramin hei aia nasa hian infiamna lamah hlawhtlinna kan nei thei tih sawiin, a hlawhtlinnaah thinlung takin a lawmpui thu a sawi bawk a ni.

He hunah hian Pu H. Dolianbuaia, Kolasib Bawrhsap pawhin lawmna thu sawiin, Lalremsiami Hmar chu mi tumruh, harsatnain a hneh zawh loh a nih thu a sawi a. Harsatna tam tak paltlanga hma lam pan zel mi a nih thu sawiin, tun dinhmun hi a thlenpui a ni, a ti. Kolasib leh Zoramin hetiang hun lawmawm tak kan tawng thei hi a lawmawm takzet a ni, a ti bawk.

He lawmna inkhawm hi Dr. C. Vanlalhlimpuia, President, Kolasib Officers’ Club chuan hunserh hmangin a hawng a. Nl. Lalremsiami pawhin thu sawiin, Kolasib mipuiten hetiang taka an lo hmuak chu lawmawm a tih thu a sawi a. "Vawiin hi a tawpna a ni lova, a bultanna a ni," a ti. Diakkawn GS-in ama hming chawia hockey khelmual tur phal taka an pe chu thinlung takin lawmthu a sawi a. Diakkawn field chu a bultanna khelmual a nih thu leh a ngainat hle thu a sawi a ni.

He hunah hian thilpek hlanna leh amah chawimawina thute au rualpui a ni a. Pu Joseph Lalrinmawia, President, Kolasib District Hockey Association chuan lawmthu sawina neiin hun hi a khar a ni.

Vawiin hun hmannaah hian Kolasib khawpui huam chhunga sorkar office hotute, NGO-te, infiamna discipline hrang hrang hruaitute, zirlai naupang sawm bikte leh mipui thahnem tak an tel a ni.