1039/2026-2027

Dated Aizawl the 17th June, 2026 : Vawiin khan Horticulture Minister Pu C. Lalsawivunga'n Horticulture Fair vawi 13-na Lammualah a hawng a, a hawnna inkhawmah hian Minister of State Prof. Lalnilawma leh MIFCO Chairman Pu Lalthazuala te pawh an tel.

Pu C. Lalsawivunga chuan Horticulture Fair in a tum ber chu kuthnathawktute’n an dehchhuah awmze neia an hralh chhuahna atan anih thu a sawi a, Aizawl khawpui leh a chheh vela chengte chu Fair a inpho te duhsak taka an thil zawrh te chu leisak turin a sawm.

Minister chuan Mizoram chu UT a nih atangin kum 50 chuang a liam tawh a, state puitling a hlankai a nih pawh kum 40 dawn a ni tawh chungin vawiinah thil siam chhuah leh deh chhuah sawi tham a la nei lo a, chu chuan Mizote chu kan la intodelh loh zia a entir, a ti a, chuvangin he Fair atang hian hmasawnna kawng kan ngaihtuah a tul a, ram leh hnam intodelh ni turin tan kan lak a ngai a ni, a ti.

Organic farming lam pawh sawiin, Pu C. Lalsawivunga chuan state dangte’n Mizoram sawhthing an duh bik chhan chu chemical tel lo, organic a nih vang a ni a, chuvangin thlai leh thei chingtute chu ‘organic’ thei ang bera ching turin a chah a, India rama lo neitu dangte’n an chin ve loh ching turin a fuih bawk. Mizoram sawrkar chuan ‘Sapthei’ hmangin pilot project kalpui chhoh a tum mek thu a sawi bawk a ni.

Prof. Lalnilawma chuan Pu C. Lalsawivunga kaihhruaina hnuaiah Horticulture Department-in nasa takin hma a sawn thu a sawi a, Mizoram chu a sik leh sain a zir avangin thei leh thlai a tha duh em em a, chuvangin Horticulture Department chu Mizoram hmasawnna atana department pawimawh berte zinga mi a nih thu a sawi.

Horticulture Fair buatsaih rual hian District tina kuthnathawktu tha ber lawmman 'Best Horticulture Farmer Award’ hlan a ni a, he award hi Fair thlengtu in a hlan a ni. Award dawngtute chu : 

Horticulture Fair hi kum 2012 atang khan neih tan niin, kumin hi a vawi 13 na a ni a, Horticulture Department chuan thei leh thlai chingtute, pangpar chingtute leh a zuar thin te, thei leh thlai vawn that theih siam lama tui mite pualin a buatsaih thin a ni. He hun hi fur ruahtui Mizoramin a dawn that hun, thei leh thlai chi hrang hrang kan phun hun mil ber turin June thla ah neih ber thin a ni. Kum 2012 atanga 2025 thlenga stall neituten an hralh chhuah tawh zat belh khawm chu ₹3,76,90,607/- a ni.

Horticulture Fair 2026 hi ni li awh (17-20 June 2026) tura ruahman a ni a, bonsai siam leh enkawl dan te, greenhouse enkawl dan te, thlai venhimna damdawi hman dan te, pangpar khawi dan te leh bamboo vinegar hman dan te inzirtirna hun hman tura ruahman a ni. Stall inpho hi a vaiin 273 a awm a ni.

Horticulture Fair hawnna inkhawm hi Pu CH Lalmuanpuia, Horticulture Department Director in a kaihruai a, Pu C. Zosangliana, Additional Director chuan technical report pein, Pi Lucy Zaithangpuii, Additional Director chuan lawmthu sawinain a hawnna inkhawm hi khar a ni.