1040/2026-2027

Lunglei, 2026 Nikir thla ni 17: Nasha Mukt Bharat Abhiyaan (NMBA) hnuaia ruihhlo do beihpui peng khat atan leh Special Intensive Revision (SIR) 2026 hnuaia electoral roll ennawn runpui kalpui mek hlawhtlinna atan Lunglei Deputy Commissioner (Bawrhsap) Pi Navneet Mann ruahmannain vawiin khan Lungleiah hlawhtling takin "Ni Khat Atan Bawrhsap" thawh hnihna (Be Deputy Commissioner for a Day 2.0) hun buatsaih niin, Bawrhsap hna thawh dan a taka an hriatna tur leh mawhphurhna pawimawh la ngam tura fuih phurtu atan Lunglei khawpui chhunga zirlai naupang sawmpathum chu Bawrhsap ṭhutthleng luahtir an ni.

"Say No to Drugs, Yes to Democracy (Special Intensive Revision)" [Ruihhlo hnawl la, mipui rorelna thlang rawh (SIR)] tih thupui hmanga District Bawrhsap Pi Navneet Mann kaihhruaia hma lakna hi an hma huna hruaitu dinhmun luah tura zirlaite cho phurtu atan leh ruihhlo tel lova an tum hlen chhuak tura tum ruhna petu atan te, electoral roll dik leh felfai a awm theihna tur leh mipui rorelna chawi nun a nih zel theih nana inzirtirna atan te ruahman a ni a. Lunglei khawpui chhunga zirna kawnga ti ṭha leh entawn tlak zirlai sawmpathum – Janet R. Lalremsangi (Govt Electric Veng High School), F. Lalhruaizeli (Govt Leitlangpui High School), ZS Malsawmsanga Sailo (Govt High School, Lunglei), C. Lalbiakdika (Baptist Higher Secondary School, Serkawn), Ramdinmawia (Govt Rahsiveng High School), Jenny Malsawmdawngi (Govt Bazar High School), Ruthi Lalzarmawii (Holy Faith School), Cindy B. Lalvensangi (Sacred Heart School), Lalrinpuia Fanai (Govt Venglai High School), Zomuansangi (FLKM School), Jonathan Malsawmtluanga (Bethesda Higher Secondary School), Freddy Lalawmpuia leh Lalzawmliani (2nd Battalion MAP English Medium School) te an tel a. A tam zawk chu sikul lamin an zirlaite zinga ti ṭha leh theihna nei an thlan chhuahte an ni a. Mi tin huap zo hma lakna a nih theih nan Education lam hotute'n vohbik zirlai, Child with Special Needs (CwSN) pakhat thlang telin, Wildcard Entry hmangin anmahni ngeiin programme-a tel an duh chhan ziaka an theh luh aṭangin zirlai pahnih thlan an ni bawk.

Zing dar 9:30-ah Bawrhsap lirthei hmangin zirlai thlan chhuah 13 te hian Bawrhsap pisa thlengin, Bawrhsap hna thawh dan hrang hrang hrilhfiah an ni a. Chumi hnuah Bawrhsap Pisaa pindan hrang hrang – Planning, Establishment, Aadhaar Cell, Disaster Management leh Election Section te fang kualin, thawktute nen an inkawm a. DC Conference Hall-ah department hrang hrang 6 – District Rural Development Office (DRDO), Election, Revenue, Police, District Disaster Management Authority (DDMA) leh Health Department te'n PowerPoint Presentation hmanga an department hna thawh leh hma lakna an tar lante ngaithlain, inkawm hona hun an hmang bawk.

Hemi hnu hian Bawrhsap hna thawh pindanah thu thar theh darhtute nen inkawmin, hemi hunah hian Bawrhsap ṭhutthlenga ṭhuin, Lunglei District hmasawnna tur hrang hrang – hmasawnna ruhrel siam, ruihhlo do, electoral roll dik leh felfai nei tura hma lak, chhiat rupna laka inven, zirna leh infiamna tihhmasawn kawnga an ngaih dan thu thar theh darhtute'n an zawh chu an chhang a. DC hma laknaa Civil Hospital Lungleia Health ATM leh Government Leitlangpui High School-a Cosmic Class te chu a hmunah tlawh a, an enfiah bakah, SIR kalpui meka electoral roll dik, felfai leh kimchang a awm theih nana Booth Level Officer (BLO)-te hna thawh leh hma lakna a hmunah hmuhpuiin, mipui rorelna (democracy) chungchanga thil pawimawh hrang hrang a takin an zir bawk.

Tlai lamah "Ni Khat Atan Bawrhsap" hun hman aṭanga Zirlai-Bawrhsapte'n an thil zir chhuah leh tawn hriatte inhrilh tawnna hun buatsaih niin, Bawrhsap Pi Navneet Mann chuan Zirlai-Bawrhsapte hnenah hian thuziak (certificate) leh thilpek (memento) a hlan a ni.

Bawrhsap Pi Navneet Mann chuan zirlaite phur taka an tel leh hlawhtling taka hun hman a ni chu lawmawm a tih thu a sawi a. Zirlaite chu an sikul leh khawtlangah a ṭha zawnga danglamna thlentu ni tur te, an tawn hriatte ṭangkai taka hmang tur leh, ruihhlo do leh democracy pawimawhna puang darhtu palai nih tum ṭheuh turin a chah.

"Ni Khat Atan Bawrhsap" tih hi zirlaite chuan an hlawkpui thu leh thil tam tak an hriat belh thu sawiin, chhunzawm zel atan ṭha an tih thu an sawi a. Lunglei Bawrhsap pawhin Lunglei District-a zirna leh zirlaite tihhmasawnna lam hawi hma lakna kalpui chhunzawm zel turin ruahmanna an siam zel tur thu a sawi.