1041/2026-2027

Lawngtlai, 17th June 2026: Furpui lo thleng tura atana inbuatsaihna neiin Lawngtlai District Disaster Management Authority (DDMA) chuan an Chairperson leh Bawrhsap nibawk Pu Donny Lalruatsanga kaihhruaiin a Office Chamber-ah thutkhawm an nei.

Pu Donny Lalruatsanga chuan Member-kalkhawmte hnena lawmthu sawina a nei hmasa a. Fur lo thleng mai turah kawng hrang hranga chhiatna lo thleng thei reng a nih thu tarlangin, DDMA Member-te bengvar taka awm tur leh a tul dan a zira chechhuak thei turin a chah a. Leiminin kawng a hnawh pin chu thleng thei reng a nih angin, kawngpui enkawltu MPWD, NHIDCL, ABCI, RDS  leh PMPL- te chu inralring reng turin a chah a ni. Chhiatna thlengah chhanchhuahna hna thawk turin QRT leh SDRF - te inrâlring renga awm a pawimawh dawn hle a ni, a ti. Chairperson chuan Tlawmngai Pawl te nen thawhhona tha a awm a pawimawh tak zet tih tarlangin, a bik takin chhiatna lo thlen thulha sawrkar nen thawhho a pawimawh dawn tih sawiin, tha taka thawkho turin a sawm a. Fur lo thleng turah mipuite tan DDMA an awm reng tih sawiin Pu Donny Lalruatsanga chuan Lawngtlai District- mipuite tan theihtawp chhuah a nih zel tur thu a sawi a ni. 

Thutkhawmah hian thil pawimawh tak tak sawiho a ni a. Furpui lo thleng turah chhiatna thleng thei reng a ni tih pawm tlangin thahnemngai taka thawhho ni se an ti a. Leiminin kawng a hnawhpin thulhah chak zawka hmalak ni se an ti a,  MPWD, NHIDCL, ABCI, RDS  leh PMPL- te chu anmahni enkawl theuh kawngah  ruahmanna fel fai taka siamin, inrâlring rengin lo awm se an ti a. A bik takin mipuiten awlsam zawka an biakpawh theih nan anmahni enkawl theuh kawnga biakna tur 'contact number' dahin  'Signage' mumal takin lo tar se an ti a ni.  Chhiatna lo thlenin biakhlatna hmanga inbiak pawh zung zung a pawimawh hle tiin, Telecom Service Provider- ten chak zawkin hma lo la se an ti a ni. Chhiatna thlen thulhah sawrkar, Company leh NGO - te inkarah thawhhona tha a pawimawh hle tiin, tha taka thawhho zel ni se an ti bawk a ni. 

Vawiin thutkhawmah hian Lawngtlai District Disaster Management Authority (DDMA) Member- te an telkim tha hle a, Pu Donny Lalruatsanga chuan lawmthu sawiin hun a khar.