1042/2026-2027

Lunglei, 2026 Nikir thla ni 17: Vawiin khan Government J. Buana College, Lunglei te chuan an college Multipurpose Hall-ah an zirlai chhuak tur VI Semester te thlahna hun, 'Valedictory Day' an hmang a. Zirlai 148 thlahin, zirlai an thlahte hi Bachelor of Arts (BA) leh Bachelor of Commerce (B.Com) zirlaite an ni.

He hunah hian Vice Principal Pu Lalrotluanga chuan Principal Address sawiin, zirlaite thlahna thu a sawi a. Pi Mary Lalromawii, Head, Department of Economics chuan zirlai chhuak turte fuihna thu a sawi bawk.

Valedictory Day-ah hian zirlai chhuak tur zinga mark hmu sang ber K. Lalnunhlimi, Department of Geography chu 'Valedictorian' atana thlan niin, ani hian inthlahna thu 'Valedictory Speech' a sawi a. Zirlai chhuak tur zinga Library hmang ṭangkai ber thlan ni bawkin, Lalhmangaihzuala, Department of Public Administration chu 'Best Library User Award' hi hlan a ni.

Programme kar lakah a inchhawkin zaithiamte zaiin, College zirlai zaithiam rualte'n 'Government J. Buana College Theme Song' an sa bawk a. Zirlai kal chhuak turte zingah award hlimawm tak, 'Hall of Fame Awards' chi hrang hrang sem niin, Students' Union hruaitu kal chhuak turte ngaihhruina thilpek hlan an nih bakah, zirlai chhuak tur zawng zawngte ngaihhruina thilpek pek vek an ni bawk a. Tlai lamah 'Valedictory Day Dinner' chawhlui kil ho niin, photo session leh jam session hun hman a ni bawk.

Government J. Buana College hi kum 1983-a din niin, tunah hian zirna ṭhuang hnih – Bachelor of Arts leh Bachelor of Commerce kalpui mek a  ni a. Arts stream-ah hian department 8 awmin, commerce stream phei hi chu Lungleia sawrkar college-a commerce zirna awm chhun a ni bawk.

Government J. Buana College hi National Assessment and Accreditation Council (NAAC)-in Grade a pek hnuhnun berah B Grade a pe a ni.