4194/2025-2026

Dated Aizawl the 28th January, 2026 : Vawiin chawhma dar 10:30 khan Mizoram Horticulture Service Association Annual (MHSA) Conference Vawi 28-na chu State Guest House, Chaltlang Lily Vengah neih a ni a. He hunah hian Horticulture Minister Pu C. Lalsawivunga chu Khuallian niin Dr. K.C. Lalmalsawmzauva, Adviser to Chief Minister, Hand Holding Scheme chu Khualzahawm a ni.

Horticulture Minister Pu C. Lalsawivunga chuan MHSA Annual Conference-ah hian thusawina hun a hmang a. Horticulture Department chu Department hlun tak leh pawimawh tak a nih thu sawiin; Mizoramin thlaithar tha kan neih theih nan leh Loneitute tanpuina kawnga an hnathawh chu fakawm a tih thu a sawi a. Sawrkar hnuaia Department hrang hrangte chuan thawhhona tha (Convergence) an neih a pawimawh hle a, a bik takin Horticulture, Agriculture leh AH& Veterinary Department-te chu Department innghengtawn leh tangkawp tlat an nih thu sawiin, Department hrang angin ding mahse; thu inhmu leh in lungrual taka hna kan thawhho phawt chuan Loneitu leh Ranvulhtute'n an hlawkpui takzet a ni a ti a. Chutihrualin, Department-te inkarah thawhona tha a awm loh chuan hmasawnna a thuanawp thin thu sawiin a tuar bertu chu Loneitu leh Ranvulhtute an ni a. Chuvang chuan thawhhona tha Convergence Policy chu a pawimawh tak zet a ni, a ti.

Mizoramin ei leh bara intodelhna kawnga ke a penna ah he huna kalkhawmte chu an thiamna leh theihna hmang zel turin Horticulture Minister chuan a fuih a. Tunlai thiamna leh hmanruate chu zirchianga hmang tangkai zel turin a chah bawk. Minister chuan Kuthnathawktute kiangah che tama, Field Work-a hnathawhte a tam thei ang ber hmu turin he huna MHSA Member kalkhawmte chu a chah a. Mahni hnaah rinawmna leh taimakna nen thawka ram hmasawnna ngaihtuah zel turin MHSA Member kalkhawmte chu a fuih a ni. Mizoram chu Chemical hlauhawm hmang loa thlai tharchhuahna hmun a nih avangin; ram pawn miten an ngaihhlut thu a sawi a. Sawrkar pawhin Mizoram chu 'Organic State' tih a hriat lar zel theih turin Bana Kaih 'Hand Holding Scheme' hmalakna hnuaiah theihtawp a chhuah thu a sawi bawk.

Khualzahawm Dr. K.C. Lalmalsawmzauva pawhin he hunah hian thusawina hun neiin, Mizoram chu thlai tharna hmun 'Horticulture ram' a ni; a ti a. Chumi chu Sawrkar pawhin hriain thlai thar chhuah kawnga Loneitute hamthat nan Flagship Programme atan Handholding Scheme chu a ruahman thu a sawi a. Hei hi Mizo thlai neih te tihlar nan leh a hralh chhuah dan tur duan fel sa (Market Oriented) a tih a nih thu a sawi bawk. Horticulture Department chu thlai chi tha leh Seeding Variety tha tak tak Mizoramin a neih theih nana thawktu Department pawimawh tak an nih thu a sawi a. Loneitute'n thlai chi tha ‘Export Quality’ an neih reng theih nan theihtawp chhuah turin a fuih bakah thlai thar sawngbawl leh dahthat (Processing) hna pawh tun aia chak zawk a ngaihtuah zel turin a chah a ni.

Dr. K.C. Lalmalsawmzauva, Adviser to Chief Minister, Hand Holding Scheme hian 'Bana Kaih' hnuaiah thlai thar leh ran vulh kawngah Mizoramin hma a sawn zel theih nan hmalakna chak taka kalpui a nih thu a sawi a. Hand Holding Progress Partner-te zingah inmamawh tawn leh thawk ho thei tam tak an awm thu sawiin, Progress Partner inmamawmhtawn te zawn chhuah leh thawhho tir chu thil pawimawh tak a nih thu a sawi.

Vawiina Mizoram Horticulture Service Association (MHSA) Annual Conference hmanna hi hun hniha then a ni a. Chawhma hun hi Pu C. Zosangliana, MHSA President-in a kaihruai a. Pu B. Lalzarzova, MHSA Gen. Secretary chuan Secretary Report pein MHSA Member thar mi 13 te lawmluhna hun a hmang nghal a ni. Dr. H. Vanlaldiki, Dy. Director (Plant Protection) chuan kumin MHSA Conference Theme 'Sustainable Cultivation of Ginger & Post Harvest Management of Mizo Ginger in Mizoram' - 'Mizo sawhthing hlawk zawka chin dan leh tharchhuah sa enkawl dan tha' tih thupui hmangin Powerpoint Presentation a pe a. He hunah hian MHSA Member boral Dr. Robert Lalrinsanga, MHSA Asst. Secretary sunna hun neih a ni bawk.

Chawhnu hun hi Pi Lucy Zaithangpuii, Vice President, MHSA chuan hun a kaihruai a. Conference thupui sawizauna leh rorelna hun neih a ni. He hunah hian Pu C.H. Lalmuanpuia, Director of Horticulture & Adviser, MHSA chuan Treasurer Report pein, Dr. Vanlalremruati Hnamte, Fin. Secretary, MHSA chuan lawmthu sawina hun a hmang a. MHSA Member Pension-te thlahna hun hman a ni bawk.