4195/2025-2026

Dated Aizawl, the 28th January, 2026: Vawiin khan Mizoram Youth Commission (MYC) chuan MINECO-a an office Auditorium-ah Food4Thought Organisation leh Monocept-te tangkawp buatsaih, India rampum Lehkhabu Chhiar Inelna, National Reading Decathlon 2025-a 2-na dinhmun hauhtu Mount Carmel School, Chaltlang leh 3-na dinhmun hauhtu La Montessori School, Mission Veng te lawmpuina hun a hmang a. He’ng sikul aiawha hlawhtlinna changtute chu Mount Carmel School atangin Krista Roluahpuia Khiangte, Class IX zirlai leh Rebek Malsawmzuali, Class VIII zirlai te; La Montessori School atangin Malsawmhlui Pachuau, Class VIII zirlai leh Joshua Lalawmpuia, Class VIII zirlai te an ni.

Pu Malsawmzuala Ralte, Chairman, MYC chuan thu sawiin, vawiina zirlai chawimawi takte chu chhuanawm a tih thu leh an lehkhabu chhiar nasatin rah duhawm tak tak – finna te, hriatna te, hmasawnna te a ken tel tur thu a sawi a. Digital age-a kan chen mek laiin mitinin ‘screen time’ tihtlem a, lehkhabu chhiar tam tura kan beih nasat zual a ngai a ni, a ti a. Mizoram tihmingthaa an thiamnate phochhuahna hun remchang a awm thei chu MYC tan pawhin a lawmawm thu sawiin, hetiang lama naupang leh thalaite puih theihna a awm phawt chuan MYC chu a inhawng reng tih a sawi a. MYC hnuaia hmalakna hrang hrangte tarlangin, nikum lamah Mizo thalai mi 400-in MYC kaltlangin hna an hmuh thu a sawi a. Zirlaite chu hlawhtling tura a duksak thu leh chu mi piah lama vanram pana ke pen zel a pawimawh thu sawiin, lawmpuina thilpek a hlan nghal a ni.

Pi V. Lalmuanpuii, Secretary, MYC atangin Reading Decathlon-a Mizoram aiawh an tel theih dan leh an zinkawng report ngaihthlak a ni a. MYC chu thalaite hmasawnna pui tura din a nih angin lehkhabu chhiar kaltlanga danglamna thlen a tum thu sawiin, hemi atan hian Promotion of Reading Culture programme an kalpui thu leh hemi hnuaiah hian MYC Book Club te dinin nikum lamah MYC Read Fest buatsaih a lo nih tawh thu a sawi a ni.

He hunah hian MYC member-te – Dr. Malsawmdawngliana Lailung leh Pu BC Tawna te bakah Mount Carmel School, La Montessori School leh Greenland Higher Secondary School atanga zirlai leh zirtirtute an tel a. Dr. Ramdinthari, Department of English, Govt. Aizawl North College chuan hun kaihruaiin, zirtirtute leh nu leh pate atangin thusawi tawi ngaihthlak a ni a. Thuthar lakhawmtute nena inkawmna hun hman a ni bawk.

Reading Decathlon hi level thuma then a ni a. State level inelna hi August ni 22, 2025 khan MYC-in an office-ah a lo buatsaih tawh a. Sikul pali an tel a. He inelnaah hian Mount Carmel School chu pakhatna an ni a, La Montessori chu pahnihna an ni a. State level round-ah hian lehkhabu 50 chuang chhiar tur pek an ni a, hemi atang hian zawhna an chhang a ni.

He'ng School pahnih te hi Regional level atana thlan an ni a, November ni 29, 2025 khan Indore, Madhya Pradesh-ah Mizoram aiawhin an tel a. Regional level hi zone 5 a then a ni a, school 21 (sawmhnih pakhat) an tel a ni. Regional level-ah hian Northeast Region-ah La Montessori hi pakhatna an ni a, Mount Carmel School hi pahnihna an ni thung. Regional Winner te hian National level ah Northeast Region ai an awh ta a ni. Regional level ah pawh hian lehkhabu 50 chuang hret chhiar tur an bituk bawk.

National level-ah hian School 10 an qualify a. January ni 17, 2026 (Inrinni) khan Hyderabad-ah neih a ni. He National level-ah hian Mizoram aiawhte hian flight cancel vangin a hmunah an tel thei lo a, Organiser-te’n online-a tel an phalsak ta hlauh a, MYC office atangin national level competition-ah hian an tel ta a ni. Zing dar 8 atanga neih tan niin tlai 5:30 ah zawhfel a ni. He inelnaah hian a vaiin lehkhabu 100 chuang hret hmanga inel a ni.