1154/2022-2023
Aizawl 5th July 2022: Vawiin khan Federation of Mizoram Government Employees & Workers (FMGE&W) chu an President Pu Lalchuailova hovin an thukhawm a, Mizoramah a vawi khatna atana 'Federation Enclave' din tur chungchang an rel bakah Pu J. Ramdinmawia, Secretary General-in Federation hmalakna hrang hrang report a pe.

Mizoram-a a vawi khatna atan World Class Housing Complex lian tak sa tur hian Blue Mountain Construction Engineering & Services Pvt. Ltd. te chu Builder & Developer atan thlan niin he Project hi an khawih ang. A Complex hmingah 'Federation Enclave' tih vuahin Mizoram Sorkar hnathawkte puala he Complex hi din tur a ni.

India leh North East huamchhunga Housing Complex changkang ber tur hi Mizoram Chief Minister, Pu Zoramthanga chuan 15th July, 2022 hian Govt. Complex, Luangmual, Aizawl-ah a tlangzarh (launch) dawn a. Hemi rual hian he Complex-a Flat/Apartment lei duhte tan Booking hawn nghal a ni ang.

He Complex-ah hian Flat/Apartment 344 (zathum sawmli pali) lai a awm dawn a. Building Block hrang hrang-ah 2 bed room, 3 bed room and 4 bed room type te thlan tur a awm dawn a ni. Heng Flat/Apartment-te hi luah hawh tur ni lovin a leia lei tur a ni a. A leitute chu Permanent Owner an ni nghal ang.

He Complex hi lirnghing laka a him theih nan Japanese Technique of Rocco Housing hman a ni dawn a. A design-tu architect hi khawvel huap pawha lar leh hmingthang Prof. Christopher Charles Benninger leh a hote an ni. Building Block tinah Elevator / Lift chak chi a awm vek ang a, Fire Safety Network te, 24 Hours Electric Power backup te, Water Recycling Plant te, Car Parking te, Club House te, intihhlimna hmun chi hrang hrangte leh thil dang dang a keng tel dawn a ni.

He Housing Complex-a Flat/Apartment te hi a changkang thei ang bera duan ni mah se mantlawm taka lei theih tura duan a ni a. 10% payment pe-a book theih a ni ang a, Bank hrang hrangin Home / Housing Loan hmangin a leitute an pui dawn bawk a ni.