1155/2022-2023
Aizawl 5.7.2022: Aizawl khawpui chhunga Vaivakawn junction ah leh Bawngkawn junction a flyover siam turin vawiin khan Chief Minister hriatpuiin Mizoram sawrkar leh TCIL (Telecommunications Consultants India) chuan thawhhona thuthlung (Memorandum of Understanding) CM Conference Hall-ah an ziak.

He an thawhhona thuthlung ang hian TCIL chuan flyover sakna tur DPR (detailed project report) siam atanga sawrkar laipuia bawhzui leh hna thawh zawng zawng nen an tum tur thu Engineer-in-Chief Er. Bowman chuan a sawi a. Mizoram sawrkarin sum sen nei lovin, TCIL hlawh tur hi DPR atangin 4% an insiam sa tur thu te, sawrkar laipuiin he project atan sum lo sanction thei lo palh pawh ni se Mizoram sawrkarin chawi engmah a neih loh tur thu te a sawi bawk.

MoU hi Mizoram sawrkar aiawhin Pu K. Lalthawmmawia, Secretary PWD leh TCIL aiawhin Rashk Siddiqui, Asst. General Manager te'n an ziak a. Advisor to CM Pu C. Lalramzauva, Advisor to CM (Technical) Er. K. Lalsawmvela (Rtd.) leh PWD department atang official pawimawh te an tel a ni.