1156/2022-2023
Aizawl, 5th July, 2022 : Dr Pachuau Lalmalsawma, Spokesperson & State Nodal Officer on COVID-19 chuan Mizoramah COVID-19 hri kai kan pun leh mek avanga fimkhurna kawnga tan la thar tur leh infuih thar turin Zoram mipuite a ngen.

Dr Pachuau Lalmalsawma chuan COVID-19 hripui leng mekin ziaawm a pan tawh a kan hriat laiin tunhnaiah khawvel pumah hri kai thar an pung leh tih sawiin, Mizoram pawh kan bang bik lova, hun kal tawha he hripui hmachhawn a hautakzia kan zavaia kan hriat tlan tawh a nih vangin sawrkar hotute pawhin mipuite him damna tur leh nunna hlu tak kan chan zel loh nan mipuite hnenah ngenna thar thawh leh tul an ti a ni, a ti.

Dr Pachuau Lalmalsawma chuan khawvel, India leh hmarchhak State dinhmun thlirin COVID-19 vei nei tawh mang lote pawhin an nei thar leh hlawm tih sawiin, India hmarchhak State hrang hranga hri kai mek awm zat belhkhawm atanga chhutin zaa 30.53 (30.53%) hi Mizorama hri kai awm mek zat an nih thu a sawi a ni.

Tun dinhmuna hri kai mi 338 awm mekte zingah nunna chan awm lo mahse heng zinga thenkhat hi in lama na tak tak leh damdawi ina awm mekte an nih thu sawiin, symptom lan chhuah hnu pawha an nat viau hma chu in test lo, an in test hnua lo tlai tawh si tun hnaiah nunna chan zingah pawh an awm tih a sawi a, thalai kum naupang tak natna dang engmah nei lo pawhin a thihpui tih a sawi a. Natna lan chhuah tan tirh emaw, inrinhlelh veleh emaw a in test ngei ngei turin mipuite a ngen a ni.

Heng bakah hian invenna man tlawm, hri kai hnua senso hautak viau bawk si COVID-19 laka kan him theihna turin khawvelin a invenna tha ber nia a la hriat COVID Appropriate Behaviour (CAB) – mask vuah uluk, kut silfai that leh midang hlata awm te hi uar thar leh turin mipuite a chah a, tun hun hi a pawimawh em em a, hun rei lote kan tanruala kan inven that theuh chuan he hri lakah hian kan fihlim thuai ang, a ti.