1157/2022-2023
Champhai, the 5th July, 2022: Champhai District chhunga hmasawnna ruhrel siam ten leilung/environment tichhe lo tura inkaihhruainate an zawm tha em tih enfiahtu Champhai District Level Monitoring Committee member-te chuan vawiin khan an Chairman Pu James Lalrinchhana, District Bawrhsap hovin National Highway (NH) 6 kawng siam mek an endik.

Kawng siam endikna hi Champhai leh Khawzawl District inrina khawchhak Tuipui atanga neih tan niin, NHIDCL leh an hnuaia contractor Shri Balaji Construction Ltd. te hmalakna hrang hrangte endik niin, hmalaknaten leilung, thing leh mau bakah nungchate chennaah nghawng tha lo a thlen thei em tihte enfiah a ni a. Leivung paihna tura ruat Spoil bank leh Muck Dumping Site-te enfiah a nih bakah paihna tura ruat niloah paih a ni em tihte endik a ni a, a tlangpuiin harsatna lian tham a thleng rih lo a ni. Saikah luiin Tuipui a finna a leivung tawlhin harsatna a thlente a tul anga bawhzui turin company hotute hriattir an ni a. Leivung tawlh tur danna gabion wall leh check dam siamte pawh enfiah niin, siam belh tul leh mamawhte company hotute bawhzui tura hriattir an ni bawk.

Hemi hnu hian Company Office Conference Hall-ah inkawmhona neih chhunzawm a ni a, kawng siamtu leh khawtual mite inkarah thawhhona tha tak a awm zel a tul thu leh kawng siam avanga harsatna thleng thinte pumpelh a nih theih dan turte sawiho a ni a. He hunah hian Company lam hotute chuan Chhungte atanga NH 6 pawh tur kawng kilometre 1 dawna thui siam a nih tur thu an tarlang a ni.

Dustrict Level Monitoring Committee chuan NHIDCL aiawhte leh an hnuaia contractor-te chu hna tlo leh tha environment tichhe lo zawnga siam tum turin an chah a. Dan zamte ngaipawimawh chung zela hnathawh kalpui turin an hrilh a ni. Hmalakna bultan hmain environment clearance neih hmasak a tul thu leh kawng siam nana thing kihthluk aiawh tur thing tam zawk phun turin an hriattir bawk a. Thing phun leh hun hmasa berah kawng siam nana ramngaw tihchereu phuhru zo ngei tur thing phun a nih theih nana hmalak dan turte sawiho a ni bawk.

NH 6 kawng laih mek Khawzawl leh Champhai inkar hi kilometre 26.78 a thui a ni a, leivung paihna tur bik hmun 35 ruat a ni a. Champhai District chan lam khawchhak Tuipui leh Khankawn inkar, kilometre 11 vela thuiah hmun 16 ah leivung paihna Muck Dumping Site 9 leh Spoil Bank 7 te ruahman a ni.

District Level Monitoring Committee Chairman Pu James Lalrinchhana hi Addl. DC Pu Henry C.Lalrawnkima, CALA; Member Secretary & DFO Pu Lalduhthlana, official dangte, Sub-Hqrs YMA bakah Tuipui leh Chhungte VC ten an tawiawm a, NHIDCL leh Shri. Balaji Construction Company hotuten an lo dawngsawng a ni.

Ruahman dan chuan July ni 8, 2022 hian World Bank Road, Khankawn to Zokhawthar endik tum a ni.

Vawiin chawhnu vek khan District Bawrhsap Pu James Lalrinchhana chuan Forest Nursery, Mualzen ami chu tlawhin hmalaknate a enfiah nghal bawk a ni.