1158/2022-2023
Khawzawl 5th July, 2022: MZP Headquarters, Khawzawl buatsaiha HSLC leh HSSLC Exam-a Zirlai tithate leh pass tharte lawmpuina hun vawiin chawhma dar 11 a neih chu District Bawrhsap Pu C.C. Lalchhuangkima chuan khuallian niin a hmanpui.

MZP Headquarters, Khawzawl Vice-President R. Malsawmkima kaihhruaia Zaingen YMA Hall-a hun hmanah hian khuallian District Bawrhsap Pu C.C. Lalchhuangkima chuan thu sawiin MZP Headquarters, Khawzawlin HSLC leh HSSLC Pass tharte chawimawina an buatsaih chu lawmawm a tih thu leh zirlaite tana hruaitute inpekna fakawm a tih thu a sawi a. Hetianga zirlaite chawimawina buatsaih h zirlaite fuihna tha tak a ni a, Stage a lawmman la tura an kal hian a lehpeka an zirlaiah lawmman leh duhna a pe a, chu chuan taimakna a hring a, phurna a pe a, anmahni nawr kaltu engine tha tak a ni, a ti a. Second leh Third Division-a Pass-te pawh lawmpuina pek an ni chuan kum lo awm leh turah chuan First Division lawmman la thei turin tan an lo la tawh ang a, First Division in Distinction la turin tan an lo la tawh ang a, hei hi vawiina HSLC leh HSSLC Passed lawmpuina programme hlawhtlinna tur a ni, a ti bawk.

Pu C.C. Lalchhuangkima chuan Zirlaite chu ruihhlo laka fihlim tur leh a tih pawh ti chhin lo turin a chah a. Mizo mipa zingah ruihhlo khawih an tam chu veiawm a tih thu sawiin, ram leh hnam hmasawn zel nan ruihhlo tih kan bansan a ngai a ni a ti a. Zirlai hlawhtlinna changte a lawmpui thu sawiin an kalzelna turah hlawhtlinna duhawm zawk chang thei tura tan la zel turin a fuih a ni.

Vawiina zirlai ti tha te chawimawina neihah hian HSLC & HSSLC Result tih chhuah taka Mark hmu sang zual 3 te hnenah Gold Medal (Rs.2000 + Citation), Silver Medal (Rs.1500 + Citation) leh Bronze Medal (Rs.1000 + Citation) hlan an ni a. HSLC-ah hian Distinction-a Pass zirlai 11, First Division 40, Second Division 29 leh Third Division a Pass 13 an awm a. HSSLC-ah chuan First Division-ah 25, Second Division-ah 28 leh Third Division-ah 29 an Pass a ni.

Vawiina HSLC & HSSLC Pass tharte chawimawina leh lawmpuinaah hian MZP General Headquarters Vice-President Pu Andrew F. Lalramnghaka leh MZP Headquarters, Khawzawl President Rosangzuala te pawhin thu an sawi a ni.