Tukin zing dar 9:00 vela Tinghmun leh Zokhawthiang inkar a kan MLA te Pu R.L. Pianmawia, Pu Lalthanliana leh Pi Vanlalawmpuii Chawngthu Assembly Assurances Committee member ten ram hmasawnna atana ruahmanna en tura kal HPC (D) nia hriatten an lo lam bun a, anmahni vengtu Police pathum (3) lai kaphlum a mi paruk (6) lai an hliam hi sorkar chuan a dem takzet a. Ram hmasawnna tura thawktute hetianga lo lambun a lo tibuai a, nunna hial lak duhtute hi an demawm takzet a ni. Sorkarin inbe rem tura theihtawpa hma a lak laia hetianga tharum thawh a ni hi a demawm chauh nilovin, a huatthlala takzet a ni.Mizoram Rorelna sang ber Assembly Session hnuhnung ber ah “Zofate inpumkhatna daltu chu engmah tih ni lo rawh se” tih lungrual taka pass a nih laia hetiang tualthahna kan ram chhung ngei ah a thleng hi pawi a ti takzet a, pawi khawitute hi Mizote leh Mizoram hmelmate an ni, sorkarin a dim lovang.
Mitthi chhungte sorkarin a tuarpui takzet a, Pathianin thlamuan a awmpui turin kan dilsak a ni. Hliam tuarte pawh an that leh thuai a beisei a, hliamte in enkawlna tur pawh sorkar in a ngaihtuah sak zel ang. Mitthi chhungte pawh a tuarpui em em a, zangnadawnna pangngai bakah chhawmdawlna awm thei ang ang sorkarin a ngaihtuah ang.
Boral te :
1) SI. Zoramthara Khawlhring OC, Sakawrdai
2) Driver Lalchuailova.
3) Constable Hmangaihmawia.
Hliamte :
1) Zarzoliana, MPS , SDPO, Sakawrdai.
2) Hav. Vanthuama. 3) Constable Lalhmangaiha.
4) Constable Lalkhawngaiha.
5) Lalchhuanawma, Driver.
6) Zohmingthanga.
Naktuk 29th March, 2015 zing dar 8:00 hian 1st MAP Ground Armed Veng ah boral tate hi urhsun taka Police Funeral Service neihpui an ni ang.
