Vawiin chawhnu dar 1:30 khan Lunglei Circuit Conference Hal- ah Chief Minister Pu Lal Thanhawla, HPC  Chairman ni bawk  kaihhruaina in HPC Meeting vawi 6-na neih a ni.  Meeting  ah hian hma lak tawh te leh hmasawnna ruhrel kalpui mek te chungchang  Member secretary V.Sapchhunga, IAS, Lunglei DC in a sawi hawnna a nei a. Hemi hnu hian Pu Joseph Lalhimpuia, Vice Chairman, HPC chuan  he meeting a pawmpui atan  HPC meeting hmasa June 8, 2011 a Infrastructure development, Lunglei district chungchang a rawtna hrang hrang 14 te a rawn chhawp chhuak a. Hemi hnu hian Agenda bawhzui dan tur sawihona hun hman a ni. Agenda zinga mi, kum 2011-12 hun chhunga HPC sum hman tur cheng nuai 700 chu sawi ho a nih hnu in pawm a ni. HPC meeting vawi 6-na ah hian LAD Minister Pu P.C Lalthanliana, Parliamentary Secretary ; Pu H.Zothangliana, Parliamentary Secretary ;  Agriculture Secretary  Pu TV Fambawl ; Minor Irrigation Secretary Pu H.Darzika leh Finance Secretary Pu Lalthansanga bakah Lunglei Distrcit a sawrkar mipawimawh te an tel a ni.

Meeting hawnna ah Chief Minister chuan  sum neih tam ringawt ai mah in sum neih chhun hman thiam chu hmasawnna leh thil sawt zawk thu a sawi a.HPC chu sum tlem te a hman tangkai avangin hmasawnna tam tak Lunglei District ah a awm phah thu a sawi a. Kan ram ti thuan awp tu chu sum ngainatna, corruption chi hrang hrang leh mahni hnathawh leh eizawnna kawng hrang hrang a tui lohna a nih thu  a sawi . Chief  Minister chuan Sawrkar a department hrang hrang ten thawhhona tha an neih a pawimawh thu a sawi a – Secretary leh sawrkar hnathawk lian te pawh Aizawl a awm mai lovin thingtlang leh Mizoram hmun hrang hrang tlawh tam turin a hriattir thin thu a sawi bawk. Vawiin meeting a  tel secretary pathum te pawn nan department kaihhnawih thil leh HPC nena an in dawrna chungchang te an sawi bak ah rawtna thenkhat an thawh hlawm a ni.

HPC in kum 2011-12 chhunga a sum hman tur cheng nuai 700 hi department  16: Agriculture, Soil& Water Conservation, Horticulture, Fisheries, Forest, Rural Development, P&E, PHE, PWD,  Art&Culture,  Sports&Youth, Education,UD&PA, LAD, Health, Social Welfare leh HPC  inrelbawl nan te  sem sawm a ni.