Vawiin Dt 5th August/2011 hian Pu K.S Thanga Parliamentary Secretary, Horticulture etc, chuan Mamit-ah Horticultural Sub-Division Office ribbon chepchat-in hawng.

Hawnna inkhawm ChhimVeng YMA Hall-a neih, Pu T. Sangkunga Secretary, Horticultural kaihhruaiah thusawiin Khuallian Pu KS Thanga chuan District Hqrs-a Circle Office chauh awm hian remchan lohna a siam thin thusawiin tha zawk leh chak zawka Department-in hna a thawh theih nan Sub Division hawn a lo ni ta hi Department leh khawtlang mipuite tan thil chhinchhiah tlak tak a ni a ti. Khuallian chuan serthlum huan siama eizawngtute tan harsatna a thlen thu sawiin tunah hian Sorkar-in helai hmun ah hian Campact Area anga serthlum huan siam tumin ruahmanna siam mek a ni a ti bawk. NLUP chungchang sawiin Mamit District hi Mizorama Potential Area nei tha ber a nih thu tarlangin eng trade tan pawh hlawhtlin theihna a ni tiin a hlawhchham chuan mipui mawh a nih a rin thu a sawi bawk a ni.

Khuallian chuan Sorkar-in hmasawnna tura ruahmanna a siam-ah a hmunhma turah mipuite pawh zau zawka kan in huam a tul thu a sawi rualin khawtlang mipuite pawh Sorkar hnathawkte tawiawm thiam turin a chah bawk.

Khuallian chuan Sawrkar hnathawkte chungchang sawiin Office Building tha leh ropui lam ni lovin tih tak tak a mahni Level theuhva ram leh mipuite tana thawh hi Sawrkar duhdan a nih thu tarlangin chutiang lama tan la turin Sawrkar hnathawkte a chah a ni. Sum hi harsa hle mahse a hmanna tur a dik a, athat phawt chuan Sorkar hian sum a nei a, a tul dan ang zelin a seng zel dawn bawk a ni a ti.

Pu K.S Thanga chuan khawvelah Christian ram, ram rethei an awm loh thu sawiin keini pawh in kan Kristianna hi kan ram hian a dinchhuahpui thei dawn em tih kan ngaituah a tul tak zet tawh a ni tiin kalkhawmte chu dingchhuak ngei turin a chah bawk.

Hawnna inkhawmah ah hian Dr.  Elizabeth Saipari, Joint Director in Report pe-in tunah hian Mamit District-ah hian Division Office, 1 Sub Division office, 2 leh Circle Office 7 a awm a.Tuna Mamit Sub Division Office hawn hian Circle pahnih W. Phaileng leh Mamit neiin khaw sawmli (40) he Sub Division hnuaiah hian a awm a ni. Tuna Mamit Sub Division Office hi Pu K.Lalduhawma DHO Tuidamin a hmui rih dawn ani.

Hawnna inkhawm-ah hian Pu Lalzirliana, Councillor, Aizawl Municipal leh Pu Lalhlupuia Chairman Joint V/C Mamit ten thu an sawi a ni.

Pu K.S Thanga hian Vawiin Dt 5th Aug/2011 vek hian Aieng Society Reiek leh Rulpuihlima Zo-Israel Serthlum chhungkaw 49 ten an siam huan a hmunah a tlawh nghal bawk a ni.

Pu K.S Thanga Parliamentary Secretary hi Department Officials ten an tawiawm a ni.