Vawiin khan Aizawl YMCA huaihawtin Synod Conference Centre-ah ‘World Peace Day’ champha phak vawi 66-na hman a ni a, Mizoram Larsap Lt.Gen.(Rtd.) M.M.Lakhera, PVSM, AVSM, VSM-in a hmanpui a ni. Khawvel Indopui II-naa Hiroshima-a bomb thlak Ni August ni 6 hi khawvel pumah indona duh loh entirna leh remna a thlanawm zawk zia entirna Ni  ‘World Peace Day’ tia vuahin hun hman a ni thin a ni.

Khuallian chuan hemi ni lungaihhthlak tak, indona avanga kan mihringpui tam tak thih niah hian nuclear bomb tihbaiawm tak avanga nunna chan ta te leh dam chhuak mahse vawiin ni thlenga rualban pha ta lote chu thinlung takin kan tawrhpui leh kan hriat reng tur an ni a; YMCA-in he ni hi khawvel pumah Remna thu puangdarh tura a hman thin chu a lawmawm tak zet a ni, a ti. India Hnam Pa Mahatma Gandhi pawhin tharum chu tharum vek a chhang let lovin, remna thu nen kan beihlet zawk chuan muanna duhawm tak a leng thei fo thin zawk a ni a ti tih sawiin India zalen hnua kan ramin indona a hmachhawn zawng zawngah a lo tel ve thin thu leh indona reng reng chu silai nilovin inhriatthiamna leh inberawn (negotiation) zawkin hnehna leh inremna a siam ziah zawk a ni, a ti. Innghirnghona  chhan bul ber chu hnam leh tawng chibingna rilru put leh sakhuana avang a ni thin a, amaherawh chu sakhua zawng zawngin hmangaihna leh remna thu an zirtir vek nachungin mihringte hmasialna avangin innghirnghona hi a piang zawk thin a. Khawvela rethei leh hausa inkar a zau lutuk tawh hian innghirnghona a tipiang  bawk a, mi rethei zawkten an chanvo tur an chang tawk lo tih an inhriatna chuan huatna leh thinrimna a tipung thin bawk a ni, a ti.

Larsap chuan Mizoram-in kum 25 chhung rambuai hun rapthlak atangin vawiin ah hian remna leh muanna karah hmasawn lam nasa takin a pan mek a. He remna leh muanna boruak duhawm chhawmnung zel tur chuan sorkar, mimal sumdawnna, tlawmngai pawl leh chhungkua ah te tanlak a ngai zel dawn a. Tunlai khawvelah phei chuan media chak tak hian remna leh muanna boruak siam kawngah hian thui tak hna an thawk thei a ni, a ti bawk. Mizoramin harsa taka remna leh muanna kan thawhchhuah hi khawvel ram dangte tan entawn tlakin vawng nung zel ila, indona leh tharumthawh aiin remna hian kawngro a su fo zawk tih chhuang takin i lantir zel ang u tiin kalkhawm zawng zawngte duhsakna a hlan a ni.

YMCA Aizawl President Pu P.C.Zoram Sangliana pawhin thu sawiin Mizoram Peace Accord kum 25-na lawm kumah YMCA-in khawvel pum huapa Remna Ni a hmang thei hi a lawmawm tak zet a ni, a ti. YMCA chuan kumin thupuiah Kristian thalaite hmanga thalaite zinga rawngbawlna hna thawh chu a thlan ang ngeiin Mizoramah pawh YMCA chuan thalaite tan kawng hrang hrangin an hmakhua siamsak a ni, a ti. Mizo thalai tam tak te chu state leh ram pawn hmun hrang hrang tlawha zinkual theihna programme siam sak an ni bawk. Heng zawng zawng hi kan rama remna leh muanna boruak rah duhawm a ni zel a ni, a ti.

Vawiin inkhawmah hian Aizawl YMCA Hony. Secretary Er. K.Lalsawmvela chuan World Peace Day tobul chungchang a sawi a. Hiroshima khuaa August ni 6, 1945 zing dar 8:15-a nuclear bomb ‘Little Boy’ tia vuah thlak a nih khan mihring 78,150 thi nghalin mi tam tak an hliam a . He khawpui sqr. mile 5 huam chhunga thil chu a chhe vek a. A hnua boruak chhia leh a kaihhnawihin a tih hlumte nen mi 2,37,062 laiin nunna an chan a ni. Indopui II na chhungin mihring maktaduai 53 chuangin nunna an chan a. Japan ral kuta thi zingah Mizo tlangval 35 lai an tel ve nghe nghe a ni. He Indona in thihna leh hun rapthlak mihring chunga a thlen tir chu awm leh tawh ngailo tura  duhtu ten remna leh muanna thlanawm zawk zia lan tirnan World Peace Day hi an hmang tan ta a ni.

Mizo thalaite zinga internet hmanga rawngbawlna chak tak nei mek Mizo Christian Youth Forum aiawhin Tv. Robert Lalduhzuala’n an hmalakna chungchang a sawi a. Tun hnaia Taiwan-a rawngbawl hlawhtling nei a lo haw Mizoram Synod Choir aiawhin Dr. Zonunsanga’n an zinna chanchin report tlangpui a pe bawk.